Վարդանանց Տօնակատարութիւն Պաղտատի մէջ
Սրբոց Վարդանանց Զօրավարաց եւ 1036 Վկայից տօնին առիթով, դարձեալ լսելի դարձաւ Պաղտատի Նարեկի սուրբ Աստուածածին Հայ Կաթողիկէ երկնասլաց Մայր տաճարի մեծ զանգակներու ղօղանջը: Արդարեւ, Վարդանանց ճակատամարտը, առաջին հերթին՝ քրիստոնէական հաւատքի և այդ հաւատքով ապրող ժողովուրդի գոյապայքարի անլռելի ղօղանջն է: Վարդանանք մեծ սուրբեր մնացին ընդմիշտ ազգին յիշողութեան մէջ: Վարդանանց ճակատամարտէն դարեր անց՝ հայ ժողովուրդը թէ՛ իր յուսահատութեան և թէ՛ ուրախութեան օրերուն առաջնորդուեցաւ անոնց հերոսական ոգիով, որովհետեւ անոր մէջ տեսաւ իր կեանքի և գոյութեան իմաստը:
Հանդիսապետութեամբ Պաղտատի Հայ Կաթողիկէ Թեմի Առաջնորդ՝ Արհի. Հ. Ներսէս Արք. Զապարեանի, Հինգշաբթի, 12 Փետրուար 2026-ին, տեղի ունեցաւ Սրբոց Վարդանանց տօնին նշումը, որուն նուիրուած սուրբ եւ անմահ Պատարագը մատուցեց Գեր. Հ. Մովսէս Վրդ. Տօնանեան: Արդարեւ, Հայ Եկեղեցւոյ Տօնացոյցին մէջ կարգուած են սուրբերու տօներ, և իւրաքանչիւր սուրբին տարուայ մէջ յատուկ օր յատկացուած է: Անոնց պատուին երգեր ու զանազան աղօթքներ նուիրուած են:
Եկեղեցւոյ Վարդապետներն կ'ըսեն, թէ սուրբերն ունին իշխանութիւն՝ բարեխօսելու մեզի համար, որուն կարիքը մենք շատ ունինք: Այս դիտաւորութեամբ մենք կը տօնենք անոնց յիշատակը, կարծես թէ Աստուծոյ ողորմութեան բանալին այդ օրը յիշատակուող սուրբի ձեռքը ըլլայ: Օրուան պատգամը փոխանցեց օրուան պատարագիչ հայրը, որ թելադրեց ներկայ հաւատացեալները միշտ յիշել Վարդանանց խորհուրդը եւ հետեւիլ Վարդաններու օրինակին: Յետ քարոզի՝ ներկայ բազմութեան մասնակցութեամբ հնչեց Վարդանանց երգեր ու շարականներ։ Եկեղեցւոյ երգչախումբը երգեց Վարդանանց նուիրուած «Նորահրաշ» և «Արիացեալք» գեղեցիկ շարականները, ինչպէս նաեւ «Վարդանանք» երգը, անմահացնելով անոնց յիշատակը:
Վերջապէ՛ս, Վարդանանց ճակատամարտը կը շարունակուի նաեւ այսօր ի տես մեր ժողովուրդի ազգային գոյութեան սպառնացող բոլոր վտանգներուն: Փոխուած են ժամանակները, պարագաներն ու պայմանները. Չէ փոխուած սակայն թշնամիին դիտաւորութիւնն ու նպատակը, հետեւաբար պէտք է սերունդէ սերունդ գոյատեւէ Վարդանանց զոհաբերութեան խորհուրդը, հաւատքի ուժը, ազգային ոգին, և զօրանայ անոնց հաւատարիմ մնալու մեր ուխտը: Քիչ անց, Առաջնորդարանի դահլիճը լեցուեցաւ կոկիկ բազմութեան ներկայութեան, ուր յաւուր պատշաճի հիւրասիրութիւն տեղի ունեցաւ, որմէ ետք ներկաները խորապէս տպաւորուած մեկնեցան, Վարդանանց ուխտը իրենց սրտերուն մէջ:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
Photogallery
