Պահքը կոչ ապաշխարութեան, և հրաւէր դէպի Աստուած երթալու

Սոնա Նորպէթլեան  - Վատիկան

​Յանուն Հօր եւ Որդւոյ եւ Հոգւոյն Սրբոյ. Ամէն։

​Սիրելի՛ քահանայ հայրեր, սիրեցեալ բարեշնորհ քոյրեր, Աղեքսանդրիոյ եւ սփիւռքի Հայ Կաթողիկէ Եկեղեցւոյ հարազատ զաւակներ, եւ Քրիստոսի բոլոր հաւատացեալներ, որ այս սուրբ շրջանին կը փնտռէք Տիրոջ դէմքը։

​1. Պահքը՝ Քաղց դէպի «Բանն», եւ ոչ թէ միայն դէպի «Հացը»

​Մեր Փրկիչը՝ Յիսուս Քրիստոս, Իր անապատի ճամբորդութիւնը սկսաւ ծոմապահութեամբ, որով ջախջախեց փորձիչին զօրութիւնը։ Երբ չարը շշնջաց. «Ըսէ՛ որ այս քարերը հաց դառնան», ան միայն ուտելիքով չէր փորձեր Յիսուսը, այլ կը ջանար Անոր ուշադրութիւնը շեղել Հօր կամքէն։

Սիրելինե՛ր, Պահքը միայն ուտելիքէ հրաժարիլ չէ, այլ յայտարարութիւն մըն է թէ՝ «Մարդ միայն հացով չ’ապրիր»։ Այս շրջանը այն ժամանակն է, երբ պէտք է լռեցնենք մեր մարմնաւոր կարիքներու աղմուկը՝ լսելու համար Աստուծոյ մեղմ ձայնը, եւ մեր քարացած սիրտերը վերածենք ոչ թէ անցաւոր հացի, այլ Սուրբ Հոգիի կենդանի տաճարներու։

​2. Հաւատքի Յոբելեան. 1725 Տարիներու Լոյսը

​Այս տարուան Մեծ Պահքը կը դիմաւորենք պատմութեան եւ սրբութեան շունչով։ Հայ Եկեղեցին գոհութիւն կը մատուցանէ Աստուծոյ՝ հայ ժողովուրդի քրիստոնէութեան ընդունման 1725-ամեակին առիթով, մեր հօր՝ Սուրբ Գրիգոր Լուսաւորիչի ձեռամբ։ Մենք պատահականութեան զաւակներ չենք, այլ այն «Լոյսին» ժառանգորդները, որ 301 թուականէն ի վեր կը լուսաւորէ մեր պատմութեան մութ էջերը։

Իսկ Եգիպտոսի սիրելի հողին վրայ, կը նշենք Գահիրէի «Սուրբ Աւետման Մայր Տաճարի» օծման 100-ամեակը։ Այս փարոսը դար մը շարունակ վկայ եղած է մեր աղօթքներուն ու հաւատքի անսասանութեան։ Այս Յոբելեանը մեզի կը հարցնէ. «Արդեօք մեր հաւատքը կենդանի՞ է մեր պապերուն հաւատքին պէս։ Մեր սիրտերը կ’աւետե՞ն Քրիստոսը մեր նմաններուն»։

​3. Հոգեւոր Պատերազմ. Ճամբորդութիւն դէպի «Ներս»

​Պահքը, սիրելինե՛ր, «հոգեւոր պատերազմ» է եւ կամաւոր աղքատութիւն՝ Աստուծմով հարստանալու համար։ Այն մուտք է դէպի «Քրիստոսի անապատը», ուր չկայ աղմուկ, այլ միայն խղճի ձայնը։

Ձեզ կը հրաւիրեմ այս Պահոց շրջանին անցնիլ արտաքին երեւոյթներէն անդին։ Բաւարար չէ միայն ուտելիքը փոխել, այլ պէտք է փոխել «կեանքի որակը»։ Մտէ՛ք Աստուծոյ սրտի խորքը, ուր կը բնակի խոնարհութիւնը, որ կը վերափոխէ մեր ընթացքը եւ մեզի թոյլ կու տայ տեսնել մեր վէրքերը՝ Երկնաւոր Բժիշկէն բժշկութիւն խնդրելու համար։

​4. Սիրոյ Համար Պահք. Վերադարձ դէպի Գորովալից Գիրկը

​Միշտ յիշեցէ՛ք «Անառակ Որդին»։ Անոր վերադարձը միայն վատ սովորութիւններէ հրաժարիլ չէր, այլ դէպի Հօր գիրկը վազելու սիրոյ շարժում մը։

Թող ձեր պահքը ըլլայ «Սիրոյ համար պահք»։ Առանց սիրոյ պահեցողութիւնը պարզապէս «սննդականոն» է, իսկ առանց ողորմութեան ծոմապահութիւնը՝ սրտի խստութիւն։ Սրտանց ապաշխարութիւնն է միայն, որ մեր պահքը կը դարձնէ «ընդունելի եւ հաճելի» Աստուծոյ առջեւ։

​Գործնական Հրաւէր

​Սիրելի՛ զաւակներ, այս քառասուն օրերը դարձուցէ՛ք առիթ՝ տեսնելու Աստուած միմեանց դէմքերուն մէջ։ Հաշտուեցէ՛ք խռովածներուն հետ, ձեռք մեկնեցէ՛ք կարօտեալին, եւ աղօթեցէ՛ք մեր Եկեղեցւոյ, մեր հայրենիքին եւ տառապեալ Միջին Արեւելքի համար։

​Սուրբ Գրիգոր Լուսաւորիչի հետ ըսենք. «Ճշմարիտ Լոյս, լուսաւորէ՛ մեր միտքերը... Հօր Սէրը, բնակէ՛ մեր սիրտերուն մէջ»։

​Օրհնեալ Պահք, փառաւոր Յոբելեան եւ բարի վերադարձ դէպի Աստուծոյ սիրտը։