«Նոր Տարի` ժամանակի սրբագործումը եւ խաղաղութեան ուխտագնացութիւնը» Հայր Գէորգ Եպիս Ասատուրեան

«Ժամանակները կը փոխուին, կ’ըսեն մարդիկ: Բայց մենք ենք ժամանակը. ինչպէս որ մենք ենք, այնպէս ալ ժամանակն է: » — Սուրբ Օգոստինոս

Ամէն անգամ, երբ օրացոյցի էջը կը դառնայ եւ աշխարհը կը տօնէ nոր տարուան mu գալուստը, քրիստոնեայ հաւատացեալին համար այդ պահը լոկ թուականի փոփոխութիւն մը չէ. ըստ Կաթողիկէ Եկեղեցւոյ վարդապետութեան՝ ժամանակը Աստուծոյ կողմէ տրուած սուրբ պարգեւ մըն է, պատեհութիւն մը (Kairos), ուր յաւիտենականութիւնը կը հանդիպի մեր առօրեային: Ինչպէս Սուրբ Գրիգոր Մեծ կը յիշեցնէ. «Անցնող իւրաքանչիւր վայրկեանը պարգեւ մըն է Աստուծմէ, որպէսզի մենք զայն օգտագործենք յաւիտենականութիւնը վաստակելու համար»:

Մարիամ Աստուածածին` Նոր Սկիզբի Դուռը
Պատահական չէ, որ Կաթողիկէ Եկեղեցին տարուան առաջին օրը՝ Յունուար 1-ը, նուիրած է Սուրբ Մարիամ Աստուածածնայ Մայրութեան հանդիսաւոր տօնին: Մարիամ այն «Այո»-ն է, որ թոյլ տուաւ Աստուծոյ մտնելու մարդկային պատմութեան մէջ: Տարին սկսելով Աստուածամօր հովանիին ներքոյ՝ մենք կը սորվինք անծանօթ ապագան դիմաւորել ոչ թէ վախով, այլ վստահութեամբ: Անոր մայրութիւնը մեզի կը յիշեցնէ, որ իւրաքանչիւր նոր սկիզբ յղի է աստուածային շնորհքով:

Խաղաղութիւնը՝ Որպէս Յոյսի Ճանապարհ
1968 թուականէն ի վեր, Յունուար 1-ը նաեւ Խաղաղութեան համաշխարհային օրն է: Պապական կոնդակները մեզի կը յիշեցնեն, որ խաղաղութիւնը լոկ պատերազմի բացակայութիւնը չէ: Ֆրանչիսկոս Պապը կը շեշտէ, թէ «Խաղաղութիւնը յոյսի ճանապարհ մըն է», որ կը կառուցուի երկխօսութեան միջոցով: Այս խաղաղութիւնը կը սկսի արդարութենէն. ինչպէս Սուրբ Պօղոս Զ. Պապը ըսած է. «Եթէ կ’ուզես խաղաղութիւն, հասիր արդարութեան»: Մենք կոչուած ենք ըլլալու խաղաղութեան «արհեստաւորներ» մեր ընտանիքներէն ներս եւ մինչեւ հանրային կեանք:

Դէպի Նորոգուած Կեանք
Նոր տարին առիթ է նաեւ քրիստոնէական ապաշխարութեան: Սուրբ Ֆրանչիսկոս Սալացի կը յորդորէ. «Ամէն օր նորոգեցէք ձեր բարի առաջադրութիւնները. Աստուած միշտ “այսօր”-ուան մէջ է»: Կաթողիկէ վարդապետութիւնը մեզ կը քաջալերէ թօթափել անցեալի մեղքերն ու ձախողութիւնները եւ Սուրբ Հոգիին շնորհքով դառնալ «նոր արարած»: Ասիկա յոյսի արարք մըն է, որովհետեւ կը հաւատանք, որ Աստուծոյ ողորմութիւնը ամէն առտու կը նորոգուի:

Եզրակացութիւն
Մինչ կը թեւակոխենք այս նոր տարին, թող մեր աղօթքը միանայ Եկեղեցւոյ տիեզերական ձայնին: Սուրբ Յովհան Ոսկեբերանի խրատին համաձայն՝ գոհութիւն յայտնենք Աստուծոյ անցած բոլոր բարիքներուն համար, որպէսզի ապագայի օրհնութեան դռները բացուին մեր առջեւ:
Հայցենք Սուրբ Կոյսին բարեխօսութիւնը, որպէսզի Տէրը օրհնէ մեր օրերը, զօրացնէ մեր հաւատքը եւ մեզ դարձնէ Իր խաղաղութեան կենդանի վկաները: Ինչպէս Պենետիկտոս ԺԶ. Պապը կը պատգամէր. «Խաղաղութիւնը Աստուծոյ պարգեւն է, բայց նաեւ մարդոց յանձնառութիւնը»:

Շնորհաւոր Նոր Տարի բոլորին: