Աստուածայայտնութեան տօնակատարութիւնը Պաղտատի Հայ Կաթողիկէ Մայր Տաճարին մէջ

Ամէն տարի Յունուար 6-ին, Հայ Կաթողիկէ Եկեղեցին մեծ տօնախմբութեամբ կը նշէ Աստուածայայտնութեան առաջին տաղաւար տօնը: Օրուայ Աւետարանը կը յիշատակէ Մոգերու այցելութեան հրաշապատումը և Յիսուսի Յորդանան գետին մէջ մկրտութեան խորախորհուրդ ծէսը: Հանդիսապետութեամբ Պաղտատի Հ. Կ. Թեմի Առաջնորդ՝ Արհի. Տ. Ներսէս Արք. Զապարեանի, Երեքշաբթի 6 Յունուար 2026-ին, առաւօտեան ժամը 11:00-ին, սուրբ և անմահ Պատարագ և Ջրօրհնէքի արարողութիւն տեղի ունեցաւ Պաղտատի Հայ Կաթողիկէ մայր տաճարին մէջ:

Այս տարի եկեղեցւոյ սպասաւորներէն՝ Միլատ Մասքոնին, բախտը ունեցաւ Յովհաննէս Մկրտիչի դերը կատարելու: Գերապայծառ տէրը իր քարոզին մէջ անդրադառնալով օրուան յիշատակութեան, ըսաւ թէ Յիսուս Քրիստոս՝ այսօր յայտնուելով աշխարհին, մեզի խաղաղութիւն և Աստուծոյ սէրը բերաւ։

Այսօր համախմբուած ենք մեր եկեղեցւոյ մէջ փառաբանելու այս հրաշալի խորհուրդը: Աստուածայայտնութեան և մկրտութեան տօնին, Աստուծոյ Միածինը մարդեղեն կերպով յայտնուեցաւ աշխարհին, Սուրբ Հոգին աղաւնիի կերպարանքով իջաւ Քրիստոսի վրայ և Հայր Աստուծոյ ականջալուր ձայնով՝ յայտնուեցաւ Ամենասուրբ Երրորդութեան խորհուրդը: Արեւելքէն եկած Մոգերն՝ աստղի նշանով եկան մանուկ Յիսուսին մօտ, որպէսզի երկրպագեն Անոր և նուիրեն ոսկի, կնդրուկ ու միրրհ, ի նշան Անոր թագաւորութեան և Աստուածութեան: Քրիստոսի Աստուածայայտնութեան տօնին կը հրաւիրեմ մեր ժողովուրդը շարունակելու ապրիլ այս սուրբ խորհուրդը յաջորդող օրերուն՝ եկեղեցական հոգեպարար արարողութիւններու միջոցաւ։

Աստուածայայտնութեան տօնակատարութիւնը Պաղտատի Հայ Կաթողիկէ Մայր Տաճարին մէջ

Այնուհետեւ, Պատարագիչ Առաջնորդին, առընթերակայ վարդապետին, սարակաւագաց և դպրաց դասուն իրերայաջորդ աղօթքներով, քարոզներով և հոգեթով երգերով շարունակուեցաւ սուրբ Զոհը: Տէրունական աղօթքին յաջորդեց «Միայն սուրբ»ը, իսկ Ս. Հաղորդութեան ժամանակ «Խորհուրդ մեծ» հիանալի շարականը, ինչպէս նաեւ «Մեր դաշտերուն մէջ երգեցին» կաղանդի երգը: Ջրօրհնեքի կարգ ընթացք առաւ «Լոյս ի լուսոյ» շարականով, որմէ ետք «Ով զարմանալի» Կոմիտասի խորազդեցիկ երգով, սուրբ միւռոնը թափօրով դարձաւ Խորանէն դէպի ժողովուրդը:

Ըստ աւանդութեան` խաչը ջուր իջեցնելը կը խորհրդանշէ Յիսուսի Յորդանան գետ մտնելը:Պատարագիչը խաչով, ապա միւռոնով կ'օրհնէ ջուրը և հաւատացեալներն այդ ջուրէն տուն կը տանին, որպէս օրհնութիւն ու բուժիչ դեղ հիւանդներու համար:

Սուրբ Պատարագի աւարտին՝ հաւատացեալները, գլխաւորութեամբ պատարագիչ Առաջնորդին ուղղուեցան Առաջնորդարանի դահլիճը` ուր տեղի ունեցաւ յաւուր պատշաճի հիւրասիրութիւն եւ շնորհաւորութիւններու ընդունելութիւն, ընտանեկան ջերմ մթնոլորտի մէջ։