Візіт Галахера ў Маскву: апублікавана праграма сустрэч
Аляксандр Амяльчэня - Vatican News
З 24 па 28 жніўня 2026 года сакратар па адносінах Святога Пасада з дзяржавамі і міжнароднымі арганізацыямі арцыбіскуп Пол Рычард Галахер знаходзіцца з візітам у Расійскай Федэрацыі. Місія ў Маскве мае дыпламатычнае, касцельнае і экуменічнае вымярэнні. Апублікаваная 24 жніўня 2026 года праграма дазваляе дакладней убачыць кола сустрэч, запланаваных падчас гэтай паездкі.
25 жніўня арцыбіскуп Галахер сустрэнецца з міністрам замежных спраў Расійскай Федэрацыі Сяргеем Лаўровым. У гэты ж дзень запланавана размова з Мітрапалітам Валакаламскім Антоніем, старшынёй Аддзела знешніх царкоўных сувязяў Маскоўскага Патрыярхату. На наступны дзень прадстаўнік Апостальскай Сталіцы сустрэнецца з Юрыем Ушаковым, дарадцам Прэзідэнта Расійскай Федэрацыі па пытаннях знешняй палітыкі.
27 жніўня праграма будзе прысвечана сустрэчам з мясцовай каталіцкай супольнасцю. Арцыбіскуп правядзе сустрэчу з духавенствам і кансэкраванымі асобамі, узначаліць эўхарыстычную цэлебрацыю ў архікатэдры Беззаганнага Зачацця Найсвяцейшай Панны Марыі ў Маскве і сустрэнецца з біскупамі.
Такім чынам, побач з перамовамі з прадстаўнікамі грамадзянскіх уладаў і Маскоўскага Патрыярхату, важнай часткай паездкі стане сустрэча з каталіцкім Касцёлам у Расіі.
Арцыбіскуп Галахер ужо наведваў Маскву ў лістападзе 2021 года. Тады ён таксама сустракаўся з Сяргеем Лаўровым, а таксама з тагачасным кіраўніком Аддзела знешніх цакоўных сувязяў Маскоўскага Патрыярхату Мітрапалітам Іларыёнам.
Цяперашні візіт адбываецца ў адной з найбольш складаных фаз міжнародных адносін і пацвярджае імкненне Апостальскай Сталіцы працягваць шлях дыялогу.
