Леў XIV ухваліў беатыфікацыю іспанскіх святароў-мучанікаў
Аляксандр Амяльчэня - Vatican News
Падчас аўдыенцыі, дадзенай 18 чэрвеня 2026 года кардыналу Марчэла Сэмерара, Пантыфік ухваліў важныя рашэнні для Касцёла. Леў XIV даручыў абнародаваць дэкрэты аб мучаніцтве Хуана Торэса Торэса і яго дзевятнаццаці паплечнікаў. Гэтыя дыяцэзіяльныя святары з астравоў Ібіца і Фарментэра былі забіты з нянавісці да веры падчас грамадзянскай вайны ў Іспаніі. Мясцовая каталіцкая супольнасць працяглы час захоўвала памяць пра іх чын. Цяпер прынята рашэнне аб іх будучай беатыфікацыі.
Загінулыя святары складалі амаль палову мясцовага духавенства падчас хвалі насілля ў жніўні і верасні 1936 года. На астравах тады моцна абмежавалі свабоду культу. Пераследнікі нават выдалялі слова "святы" з назваў паселішчаў, каб цалкам знішчыць каталіцкую ідэнтычнасць. Хуан Торэс Торэс быў самым маладым, сціплым і шчодрым сярод гэтай групы.
Разам з тым Касцёл прызнаў гераічнасць цнотаў яшчэ пяці выбітных праведнікаў. Маці Клара Андрэў-і-Мальферыт, іспанская манахіня з Маёркі, нарадзілася 4 снежня 1596 года і спалучала дапамогу хворым з глыбокім містычным досведам. Бельгійскі святар Жуліа Эміліа Альберт Дэ Ламбардэ, заснавальнік некалькіх кангрэгацый, прысвяціў жыццё місіі ў Амазоніі і загінуў у аўтакатастрофе 24 снежня 1944 года. Ён прыняў бразільскае грамадзянства 19 жніўня 1941 года і заўсёды адзначаўся моцным апостальскім запалам. Абодва праведнікі пакінулі пасля сябе выдатны прыклад паслухмянасці і абсалютнага даверу Богу.
Сярод новых Слугаў Божых – італьянская дамініканка Марыя Пэтра Джардана, якая нарадзілася 4 ліпеня 1912 года і доўгі час была прыарысай дамініканскага кляштара ў Таскане. Яшчэ адна падзвіжніца, маці Марыя Тэрэза Талон, паходзіла з Нью-Ёрка і заснавала жаночую супольнасць "сузіральніц на вуліцы" для хрысціянскага выхавання пакінутых дзяцей. Італьянская манахіня Марыя Аньезэ Трыбіёлі, якая нарадзілася ў Фларэнцыі 20 красавіка 1879 года, у гады Другой сусветнай вайны мужна ратавала яўрэяў ад нацыстаў. За сваю адважную дзейнасць яна была пасмяротна прызнана "Праведніцай народаў свету".
