Леў XIV сустрэнецца з алімпійцамі ў Ватыкане
Аляксандр Амяльчэня – Vatican News
Сустрэча Пантыфіка з атлетамі прызначана на чацвер 9 красавіка 2026 года. Анонс гэтай падзеі адбыўся ў “Зале Марконі” Палаца Піа, сядзібе СМІ Святога Пасада, падчас прэзентацыі папскага паслання “Жыццё ў поўні” (La vita in abbondanza).
Кардынал Таленціну дэ Мендонса, прэфект Дыкастэрыі па культуры і адукацыі, падкрэсліў, што гэты прыём стане сапраўдным святам, праз якое Папа хоча сімвалічна абняць усіх спартсменаў свету як сведак гуманізму і міру.
Галоўнай гераіняй сустрэчы ў Ватыкане стала італьянка Франчэска Лалабрыджыда, двухразовая алімпійская чэмпіёнка па канькабежным спорце. Яна падзялілася кранальнай гісторыяй свайго шляху “мамы-атлеткі”, які пачаўся ў 2023 годзе і прывёў да залатых медалёў на Гульнях у Мілане-Карціне. Спартсменка прызналася, што яе поспех быў бы немагчымы без падтрымкі блізкіх і веры ў тое, што ніводная вяршыня не дасягаецца ў адзіночку.
Асаблівую ўвагу падчас размовы надалі паняццю мяжы. Кардынал нагадаў словы Льва XIV аб тым, што чалавечая слабасць ці абмежаванасць – гэта не тупік, а “парог, на якім трэба жыць”.
Менавіта ўсведамленне ўласных меж робіць намаганні значнымі, а прагрэс – зразумелым. Лалабрыджыда пацвердзіла гэта ўласным вопытам, узгадаўшы, як пасля цяжкай хваробы перад Алімпіядай ёй прыйшлося літаральна прымушаць сябе вярнуцца на лёд, пераадольваючы знявер’е.
У фінале сустрэчы была прадстаўлены сімвалічны “Кубак апошніх”. Гэтая ініцыятыва супольнасці “Athletica Vaticana” будзе рэалізавана падчас Рымскага марафону 22 сакавіка. Узнагароду атрымае не той, хто прыбег першым, а той, хто праявіў найбольшую стойкасць і годнасць, фінішуючы далёка ад святла пражэктараў. Гэта ідэальна сугучна з думкай Папы аб тым, што культура спорту павінна быць вольнай ад логікі спажывання і пустой відовішчнасці.
