Ватыканскі курс для святароў: споведзь як духоўнае адраджэнне
Аляксандр Амяльчэня - Vatican News
З 9 па 13 сакавіка ў Рыме пройдзе XXXVI Курс Апостальскай Пэнітэнцыярыі, прысвечаны ўнутранаму форуму (forum internum) – прасторы чалавечага сумлення. Кульмінацыяй падзеі стане аўдыенцыя ў Льва XIV і супольная цэлебрацыя сакрамэнту пакаяння.
Напярэдадні курса біскуп Кшыштаф Ныкель у інтэрв'ю ватыканскім СМІ падзяліўся думкамі пра тое, што споведзь з'яўляецца "жыватворнай крыніцай, у якой аб'яўляецца моц ласкі". Ён падкрэсліў, што адказнасць спаведніка велізарная, бо сустрэча ў канфесіянале "будуе Касцёл нябачным, але рэальным чынам".
Курс дапамагае святарам не толькі засвоіць кананічнае права, але і навучыцца разважліва прымяняць нормы ў канкрэтных жыццёвых сітуацыях. Канфесіянал трэба разумець як прастору сустрэчы з асобай, яе гісторыяй і маральнымі драмамі. Спаведнік павінен быць не дамінантам, а слугой, які дбае пра духоўную карысць чалавека.
Біскуп называе споведзь "сакрамэнтам надзеі", бо яна дае рэальную магчымасць новага пачатку. Вопыт Юбілейнага 2025 года паказаў жывучасць гэтай практыкі: у рымскіх базіліках многія людзі вярталіся да сакрамэнту пасля шматгадовага перапынку. Сучасны свет часта пакідае чалавека ў экзістэнцыяльнай пустэчы, але адначасова расце гатоўнасць да глыбокіх рэлігійных пошукаў.
Падчас нядаўняй сустрэчы з моладдзю Леў XIV нагадаў: "Грэх ніколі не мае апошняга слова". Біскуп Ныкель дадаў, што маладыя людзі сёння шукаюць на споведзі не толькі адпушчэння грахоў, але і духоўнага дыялогу.
Касцёл як ніколі мае патрэбу ў добрых святарах, якія разумеюць, што "канфесіянал – гэта дом Міласэрнасці і ціхае месца сустрэчы з міласэрнай любоўю Бога", рэзюмаваў іерарх.
