Галоўны папскі арганіст пра "святое хваляванне" і акустыку
Аляксандр Амяльчэня – Vatican News
Іспанскі музыка Жазэп Сале Коль, які займае пасаду першага арганіста Базілікі Святога Пятра, падзяліўся сваімі думкамі аб адказнасці перад Богам і мільёнамі вернікаў.
У інтэрв’ю парталу "katholisch.de" ён падкрэсліў, што ігра пад купалам, створаным Мікеланджэла, – гэта не проста музычнае выкананне, а сапраўднае служэнне, якое праз трансляцыі сягае далёка за межы Ватыкана. Паводле яго слоў, кожны акорд павінен спрыяць евангелізацыі і ўздымаць сэрцы слухачоў ва ўсім свеце.
Арган як сродак евангелізацыі
Асаблівай складанасцю ў працы арганіста з’яўляецца ўнікальная акустыка галоўнага каталіцкага храма. Жазэп Сале Коль патлумачыў, што рэха ў Базіліцы доўжыцца ад сямі да васьмі секунд, што патрабуе ад музыкі ювелірнай дакладнасці. Замест звыклага страху перад публікай артыст адчувае тое, што сам называе "святым хваляваннем". Гэты стан узнікае з усведамлення, што Папа знаходзіцца ўсяго ў некалькіх метрах, а сама літургія з’яўляецца боскім дзеяннем, дзе музыка служыць вышэйшай мэце.
Музычныя перавагі Пантыфікаў
Успамінаючы працу з папярэднікамі Льва XIV, арганіст адзначыў, што Бэнэдыкт XVI меў канкрэтныя пажаданні да рэпертуару, а падчас пантыфікату Францішка праводзіліся эксперыменты з опернай музыкай, якія, аднак, не заўсёды пасавалі да літургіі. Што тычыцца Льва XIV, Жазэп Сале Коль заўважыў, што новы Пантыфік сам добра спявае.
Музыкі Ватыкана пакуль знаходзяцца ў працэсе знаёмства з духоўным профілем Святога Айца. Сувязным звяном паміж пастырскай воляй Папы і музычным напаўненнем заўсёды выступае майстар папскіх літургічных цэлебрацый. Кожнае набажэнства становіцца чарговым досведам разумення таго, як папская духоўнасць пераплятаецца з майстэрствам выканаўцаў.
