Кардынал Петрокі стаў на чале нагляду за Ватыканскім банкам
Аляксандр Амяльчэня - Vatican News
Дзень 1 лютага 2026 года адзначыўся важнымі кадравымі зменамі ў структуры кіравання галоўнай фінансавай установай Апостальскай Сталіцы. 77-гадовы кардынал Джузэпэ Петрокі прыняў на сябе абавязкі кіраўніка кантрольнага органа, які сочыць за дзейнасцю Інстытута рэлігійных спраў, вядомага ў свеце як Ватыканскі банк. Ён пераняў гэтую эстафету ад кардынала Крыстафа Шонбарна, які ўзначальваў камісію апошнія два гады.
Новы кіраўнік – чалавек з багатым досведам
Кардынал Петрокі з’яўляецца фігурай значнай у сучасным жыцці Касцёла. Да свайго цяперашняга прызначэння ён прайшоў доўгі шлях служэння: ад кіравання дыяцэзіяй Лаціна-Тэрачына-Сэцэ-Прыверна да пасады арцыбіскупа мітрапаліта Л’Аквілы, якую ён займаў да 2024 года. У 2018 годзе Папа Францішак узвёў яго ў годнасць кардынала, а праз два гады даверыў яму кіраўніцтва ватыканскай камісіяй па вывучэнні пытання жаночага дыяканату.
Спецыфіка і задачы ватыканскага банка
Інстытут рэлігійных спраў, заснаваны яшчэ ў 1942 годзе, выконвае ўнікальную ролю ў структуры Каталіцкага Касцёла. Гэтая ўстанова кіруе актывамі каля дванаццаці тысяч кліентаў, сярод якіх пераважаюць духавенства, манаскія ордэны, дыяцэзіі і дыпламаты, акрэдытаваныя пры Апостальскай Сталіцы. Дывідэнды з прыбытку Банка з’яўляюцца істотнай падтрымкай для дзейнасці Святога Пасада.
Кантроль і стратэгічнае кіраванне
Камісія кардыналаў, якую цяпер узначаліў Петрокі, складаецца з пяці чалавек і падпарадкоўваецца непасрэдна Пантыфіку. Гэты орган мае выключныя паўнамоцтвы: ён разглядае бізнес-працэсы і стратэгіі, прадстаўленыя Назіральнай радай, а таксама зацвярджае яе склад.
З 2014 года пасаду старшыні Назіральнай рады займае французскі фінансіст Жан-Батыст дэ Франсу, з якім цяпер будзе шчыльна супрацоўнічаць новы старшыня Камісіі для забеспячэння адпаведнасці ўсіх дзеянняў статуту Інстытута.
