Кардынал Паралін: Марыя аздараўляе ад пыхі, якая падзяляе людзей
Марыя Валодзіна - Vatican News
У гаміліі кардынал Паралін нагадаў, што 7 сакавіка 1426 года Панна Марыя аб’явілася простай сялянцы Вінчэнцы Пазіні на ўзгорку Монтэ-Берыка. Пасля гэтага эпідэмія чумы, якая спусташала горад, спынілася. З таго часу санктуарый, прысвечаны Маці Божай Міласэрнасці і даручаны ордэну служак Марыі, стаў месцам пілігрымак шматлікіх вернікаў.
Іерарх адзначыў, што “Марыя заклікае нас дазволіць Богу гаварыць у Хрысце. Запрашае да ўнутранай цішыні і здольнасці слухаць голас Пана. Толькі так Вічэнца, Венета і ўсе пілігрымы, якія прыедуць сюды ў гэты юбілейны год, змогуць адчыніць “зачыненыя дзверы”, аднавіць зламаныя і няскончаныя лёсы, вызваліць месца для радыкальнай роўнасці і пераадолець пачуццё перавагі, якое падзяляе людзей”.
Школа чалавечнасці для сучаснага грамадства
Дзяржсакратар папярэдзіў, што і сёння чалавечыя словы могуць занявольваць цела і дух. Ён падкрэсліў, што толькі калі “дазволіць Богу гаварыць у Хрысце”, можна аднавіць сапраўдную свабоду, роўнасць і годнасць кожнага чалавека, адкрыўшы будучыню для ўсіх, а не толькі для кагосьці. Кардынал Паралін заклікаў вернікаў нанова адкрыць "тую сапраўдную школу чалавечнасці, якая, гледзячы на Марыю, ацаляе горад ад сацыяльнай варожасці, што, як чума, забівае цела і дух, ізалюючы кожнага ў сваіх страхах і кашмарах".
Марыйны Юбілей у Вічэнцы будзе доўжыцца ўвесь год і ўключыць малітоўныя, духоўныя і культурныя мерапрыемствы, арганізаваныя дыяцэзіяй, ордэнам служак Марыі, мясцовымі ўладамі і рэгіёнам Венета.
Размова з журналістамі пасля набажэнства
Адказваючы на пытанні журналістаў пасля Імшы, кардынал Паралін, які паходзіць з гэтых мясцін, нагадаў пра сваю асабістую сувязь з Монтэ-Берыка. Ён адзначыў, што Маці Божая заўсёды суправаджала яго жыццё, і ў радасныя, і ў цяжкія моманты, і назваў санктуарый “бяспечнай гаванню”, куды ён заўсёды з задавальненнем вяртаецца.
Закранаючы бягучыя падзеі, Дзяржсакратар падкрэсліў, што місія Святога Пасада і яго дыпламатыі – служыць справе міру, пачынаючы з вучэння Папы і штодзённых намаганняў па прадухіленні, пасрэдніцтве і вырашэнні канфліктаў. Гаворачы пра Украіну, ён выказаў надзею на завяршэнне вайны і адзначыў важнасць самога факту перамоў: “Тое, што ідуць перамовы, ужо вельмі важна. Паглядзім, якія будуць вынікі", - заўважыў Паралін.
Акрамя таго, ён нагадаў пра значэнне спорту як паслання згоды, братэрства і міру, заклікаўшы да захавання алімпійскага перамір’я падчас зімовых Алімпійскіх гульняў - 2026.
