Кардынал Кох: “Дапамога Касцёлу ў патрэбе” – не толькі грошы
Аляксандр Амяльчэня - Vatican News
Старшыня Папскага дабрачыннага фонду і прэфект Дыкастэрыі спрыяння хрысціянскаму адзінству наведаў міжнародную сядзібу арганізацыі ў нямецкім Кёнігштайне.
Падчас сустрэчы з калектывам і сумеснай Эўхарыстыі іерарх падкрэсліў, што галоўная радасць хрысціяніна – несці пасланне Езуса Хрыста тым, хто знаходзіцца ў цяжкай сітуацыі.
Дапамога – гэта не толькі матэрыяльныя рэсурсы, але і дар веры
Кардынал Кох звярнуў асаблівую ўвагу на крызіс рэлігійнасці ў заходніх грамадствах, дзе “вера ў некаторых рэгіёнах вельмі слабая”. Ён адзначыў, што дзейнасць Фонду павінна быць накіравана не толькі на фізічнае выжыванне супольнасцей, але і на духоўнае адраджэнне праз малітву і сведчанне Евангелля.
Адзінства Касцёла як інструмент міру ў свеце
Пурпурат правёў паралель паміж сваёй працай у сферы экуменізму і місіяй дабрачыннай арганізацыі, адзначыўшы, што абедзве структуры працуюць з рознымі формамі выяўлення хрысціянства. Ён папярэдзіў, што без агульнага духу і ўнутранай згоды паміж вернікамі немагчыма эфектыўна пераадольваць знешнія канфлікты і войны, якія раздзіраюць сучаснасць.
Паводле слоў кардынала Коха, толькі з’яднаны Касцёл, які здольны пераступіць праз уласныя гістарычныя падзелы і супярэчнасці, можа быць для грамадства пераканаўчым знакам надзеі. Калі хрысціяне сведчаць пра магчымасць прымірэння ўнутры сваёй супольнасці, яны становяцца дзейсным інструментам міру, прапануючы свету мадэль суіснавання, заснаваную на любові, а не на варожасці.
