Ватыкан прэзентаваў новы мабільны дадатак
Аляксандр Амяльчэня - Vatican News
Дзяржава Ватыкан зрабіла чарговы крок у галіне лічбавых інавацый, прадставіўшы афіцыйны мабільны дадатак. Новы інструмент прысвечаны памяці і выключным камп’ютарным здольнасцям святога Карла Акуціса, якога часта называюць нябесным апекуном інтэрнэту.
Дадатак цалкам інтэграваны з інфармацыйным парталам vaticanstate.va, што дазваляе карыстальнікам атрымліваць доступ да афіцыйных паведамленняў і аб’яў у рэжыме рэальнага часу праз сістэму push-апавяшчэнняў.
Асноўная мэта ініцыятывы – зрабіць інфармацыю пра жыццё і дзейнасць Губернатарата больш даступнай і інклюзіўнай. Інтэрфейс праграмы спраектаваны для зручнага выкарыстання на смартфонах і планшэтах, забяспечваючы інтуітыўную навігацыю па актуальных падзеях, інтэрв’ю і відэаматэрыялах. Гэта частка шырэйшай стратэгіі лічбавай мадэрнізацыі, якую праводзіць Ватыкан для паляпшэння сувязі з вернікамі і грамадскасцю.
Праграма змяшчае рубрыку "Святы дня" і забяспечвае прамыя спасылкі на ключавыя інстытуты, такія як Ватыканскія музеі, Ватыканская аптэка, Пошта і Ватыканская абсерваторыя.
Акрамя навіннай стужкі, карыстальнікі могуць карыстацца сэрвісамі іншых устаноў Губернатарата, уключаючы доступ да інфармацыі аб папскіх вілах.
Распрацоўшчыкі абяцаюць, што функцыянал праграмы будзе паступова пашырацца, дадаючы новыя інтэрактыўныя магчымасці. На сённяшні дзень дадатак ужо даступны для бясплатнай спампоўкі ва ўсіх папулярных сэрвісах мабільных праграм.
