Паэзія, якая маўчыць: таямніцы этрускаў у Ватыканскіх музеях
Аляксандр Амяльчэня - Vatican News
Першае сёлетняе мерапрыемства з цыкла “Чацвер у музеях” прысвечана Грыгарыянскаму этрускаму музею. Гэта знакавая падзея, бо з дакладам “Урок метаду” выступіць прафесар Франчэска Ранкалі, які кіраваў гэтай установай амаль дваццаць гадоў – з сярэдзіны 1960-х да пачатку 1980-х гадоў.
Прафесар вядомы сваёй працай над унікальнымі помнікамі, такімі як “Марс з Тодзі” або ільняныя кнігі этрускаў. Яго нядаўняя публікацыя “Паэзія, якая маўчыць” (2025) яшчэ раз падкрэслівае глыбокую сувязь паміж мастацтвам і словам, якую навуковец даследаваў праз прызму этрускага жывапісу, натхняючыся думкай старажытнагрэчаскага паэта Сіманіда Кеоскага.
Грыгарыянскі этрускі музей, заснаваны Папам Грыгорыем XVI у 1837 годзе, хутка адзначыць свой 200-гадовы юбілей. Гэтая ўстанова заўсёды вылучалася асаблівым падыходам да фарміравання калекцыі, дзе экспанаты адбіраліся паводле іх эстэтычнай якасці і ўнікальнасці.
Сённяшнюю сустрэчу ўзначаліць дырэктар Ватыканскіх музеяў Барбара Ята, а ў дыскусіі прыме ўдзел цяперашні куратар аддзела этруска-італійскіх старажытнасцей Маўрыцыа Санібале.
Для навуковай супольнасці выступ Ранкалі – гэта не проста справаздача, а шчыры перагляд інтэлектуальнага шляху. Даследчык падзеліцца тым, як штодзённы кантакт з шэдэўрамі антычнасці ў ватыканскіх залах фарміраваў яго метад і нараджаў новыя тэорыі пра культуру народа, які стаў духоўным і культурным папярэднікам Рыма.
Пасля завяршэння тэарэтычнай часткі ўдзельнікі сустрэчы наведаюць залы Этрускага музея.
