Ватыкан: новы паварот у справе аб фінансавых махінацыях
Аляксандр Амяльчэня - Vatican News
Вышэйшая судовая інстанцыя Дзяржавы Ватыкан паставіла важную працэсуальную кропку ў рэзананснай справе, якая тычыцца злоўжыванняў пры куплі нерухомасці ў Лондане.
Як паведамляе журналіст “Vatican News” Сальваторэ Чэрнуцыа, Касацыйны суд разгледзеў скаргі Алесандра Дзідзі і вынес дзве пастановы, якія істотна ўплываюць на далейшы ход працэсу.
Суд пацвердзіў немагчымасць далейшага ўдзелу абвінаваўцы ў працэсе
Склад суда, у які ўвайшлі кардыналы Фарэл, Ладжудзічэ, Дзупі і Гамбеці, афіцыйна прыняў заяву Дзідзі аб самаадводзе. Гэтаму кроку папярэднічаў запыт аб адводзе, пададзены чатырма падсуднымі яшчэ ў верасні 2025 года.
Абарона настойвала на тым, што ўдзел прамотара справядлівасці ў сумнеўных перапісках у месенджарах мог паўплываць на сведак і парушыць прынцып непрадузятасці суду.
Касацыйны суд таксама пакінуў у сіле рашэнне Апеляцыйнага суда ад 25 верасня, прызнаўшы скаргу Дзідзі “непрымальнай”. Гаворка ідзе пра спробу абвінавачання апратэставаць апраўдальныя прысуды, вынесеныя па некаторых пунктах яшчэ ў снежні 2024 года. Абаронцы фігурантаў справы змаглі даказаць працэсуальныя парушэнні і зацягванне тэрмінаў пры падачы гэтай апеляцыі.
Судовыя пасяджэнні пасля перапынку адновяцца ў лютым
Зараз удзельнікі працэсу рыхтуюцца да працягу другога этапу. Пасля працяглага перапынку, устаноўленага старшынёй апеляцыйнай інстанцыі арцыбіскупам Алехандра Арэльяна Цэдзілья, працэс павінен аднавіцца 3 лютага 2026 года.
Цэнтральнай тэмай гэтага шматгадовага разбору з’яўляецца няўдалая інвестыцыя ў лонданскую нерухомасць на Слоун-авеню, якая прывяла да велізарных страт і выявіла цэлую сетку фінансавых махінацый.
Гэтая справа, што стала найбуйнейшай у гісторыі сучаснага правасуддзя Ватыкана, ахоплівае абвінавачанні ў махлярстве, злоўжыванні службовым становішчам і адмыванні грошай, у якіх фігуруюць як высокапастаўленыя духоўныя асобы, так і свецкія фінансісты.
