Лекі ад адзіноты: кардынал Чэрны прадставіў папскае пасланне
Аляксандр Амяльчэня - Vatican News
Прэфект Дыкастэрыі па інтэгральным развіцці чалавека падкрэсліў, што сёлетняе папскае пасланне закранае тэму аздараўлення, якое глыбейшае за медыцынскія працэдуры. Дакумент засяроджаны на трох аспектах: шчырай сустрэчы, спачуванні і сапраўднай любові. “Кожнаму патрэбны той, хто яго выслухае”, - нагадаў іерарх, называючы прысутнасць побач з хворым лепшымі лекамі ад адзіноты.
Паводле слоў кардынала, Папа заклікае вернікаў не проста захапляцца Добрым Самаранінам, а наследаваць яго, бо якасць нашых адносін правяраецца менавіта ў хвіліны чужой бездапаможнасці.
У цэнтры папскага дакумента знаходзіцца непарыўная сувязь трох вымярэнняў любові: да Бога, да бліжняга і да самога сябе. Спасылаючыся на думку Бэнэдыкта XVI, кардынал нагадаў, што чалавек здабывае сваю сапраўдную вартасць не праз замкнёнасць у сабе, а праз жывыя адносіны з іншымі і Стварыцелем. Служыць бліжняму — значыць любіць Бога не на словах, а праз дзейную прысутнасць у жыцці тых, хто найбольш патрабуе суцяшэння.
