325-годдзе дыпакадэміі: Паралін пра дыпламатыю ў часы крызісу
Аляксандр Амяльчэня - Vatican News
Кардынал П’етра Паралін, Дзяржаўны сакратар Яго Святасці і Вялікі канцлер Касцельнай акадэміі, выступіў з лекцыяй “Мір і справядлівасць у працы дыпламатыі Апостальскай Сталіцы перад абліччам новых выклікаў”.
Нагодай для сустрэчы ў ватыканскім Апостальскім палацы стала 325-годдзе з дня заснавання гэтай установы, якая рыхтуе будучых папскіх дыпламатаў.
Крызіс сусветнага парадку і роля Касцёла
У сваім выступленні іерарх адзначыў, што сучасная сістэма міжнародных адносін, пабудаваная восемдзесят гадоў таму, больш не адпавядае рэальнасці. Замест права на сцэну выходзіць сіла зброі, а замест дыялогу – палітыка выключэння.
Кардынал Паралін падкрэсліў неабходнасць новага стылю ў дыпламатыі, здольнага даць надзею свету, які пакутуе ад разрыву паміж багатымі і беднымі краінамі.
Сённяшняя бяспека не можа абмяжоўвацца выключна вайсковым аспектам. Паводле слоў Дзяржсакратара, яна павінна ўключаць харчовую, экалагічную, энергетычную і, што вельмі важна, рэлігійную сферы. Апошняя асабліва актуальная ў часы, калі вернікі сутыкаюцца з дыскрымінацыяй і прымусовай ізаляцыяй.
Дыпламатыя як “бяззбройны шлях”
Спасылаючыся на вучэнне Папы Льва XIV, кіраўнік дыпламатыі Святога Пасада нагадаў, што мір і справядлівасць караняцца ў хрысціянскай таямніцы. Гэта не проста палітычныя мэты, а дар, які патрабуе ад чалавека канкрэтных крокаў: медыяцыі, захавання міжнароднага права і ўмацавання супрацоўніцтва паміж народамі.
Праца дыпламата – гэта заўсёды служэнне агульнаму дабру, якое дазваляе кожнаму чалавеку і кожнай супольнасці дасягаць сваёй дасканаласці.
Кардынал Паралін заклікаў будучых дыпламатаў не быць проста назіральнікамі гісторыі, а стаць яе героямі, выкарыстоўваючы “бяззбройны шлях дыпламатыі” як адзіны магчымы сродак для пераадолення канфліктаў.
