Католікі і метадысты: ватыканская кніга пра шлях да адзінства
Аляксандр Амяльчэня - Vatican News
Ватыканскае выдавецтва прэзентавала новае выданне, якое дакументуе гісторыю збліжэння паміж Каталіцкім Касцёлам і Сусветнай метадысцкай радай. Кніга пад назвай "Мы верым у адзінага Бога" збірае вынікі працы 11 справаздач Міжнароднай камісіі (MERCIC), створаных з моманту пачатку афіцыйнага дыялогу ў 1967 годзе.
Гэта не проста архіў дакументаў, а "сведчанне надзеі і заклік да больш глыбокай камуніі", як адзначаюць аўтары. Выданне стала своеасаблівым падарункам Цэрквам у год юбілею Нікейскага сабора – першай спробы хрысціян дасягнуць кансэнсусу.
Аздараўленне памяці і ўзаемны давер
Унікальнасць гэтага дыялогу палягае на тым, што паміж двума супольнасцямі няма гісторыі прамога разрыву, бо метадызм узнік як рух адраджэння ўнутры Англіканскай Царквы. Аднак, як адзначаецца ў кнізе, падзел усё ж існуе і патрабуе "аздараўленне памяці". Публікацыя шчыра разглядае як агульныя перакананні ў трынітарнай веры, так і існуючыя адрозненні ў пытаннях дактрыны, сакрамэнтаў і структур улады.
Асаблівая ўвага нададзена тэме Эўхарыстыі, дзе назіраецца "значнае збліжэнне": метадысты ўсё больш прызнаюць важнасць стала Пана, а католікі – значэнне прапаведавання Божага Слова. Хоць пытанне інтэркамуніі застаецца адкрытым, бакі заахвочваюць вернікаў максімальна выкарыстоўваць існуючыя магчымасці для супольнай малітвы.
Кніга не абмінае і вострых сацыяльна-этычных пытанняў, такіх як пасвячэнне жанчын і аднаполыя саюзы, пазначаючы іх як тэмы для далейшага вывучэння.
Гэта выданне стала важным знакам надзеі на працяг экуменічнага шляху.
