Кардынал Краеўскі на абедзе з беднымі: мір пачынаецца ў сэрцах
Аляксандр Панчанка – Vatican News
З нагоды ўрачыстасці Божага Нараджэння каля ста бедных, у тым ліку некалькі бяздомных, атрымалі цёплую ежу, пачулі добрыя словы, сустрэлі клапатлівыя позіркі і ўвагу. Святочны абед прайшоў у дабрачынным цэнтры ў Палацы Мільёры, якім апякуецца Супольнасць святога Эгідзія пры падтрымкі Дыкастэрыі па міласэрным служэнні.
Заставацца з Богам, Які хоча быць з намі
Вітаючы прысутных на сустрэчы, кардынал Конрад Краеўскі заклікаў усіх “падзякаваць Богу, Які хоча быць з намі” і “заставацца з Ім – не аддаляцца ад Яго”. “Але перш за ўсё давайце памолімся за мір, якога так не хапае нашаму свету”, - сказаў іерарх.
Супакой пачынаецца ў сэрцы
Апостальскі элемазінарый нагадаў, што “мір пачынаецца з нас, з нашых сэрцаў, з нашага жыцця і сведчання”. Спасылаючыся на тое, пра што Леў XIV сказаў раней у пасланні перад благаслаўленнем “Urbi et Orbi”, ён заклікаў маліцца за тых, хто пакутуе ад самотнасці і адсутнасці міру, асабліва ў Газе, Украіне, краінах Афрыкі і многіх іншых частках свету.
Супольны святочны абед
Пасля супольнай малітвы госці дабрачыннага цэнтра, сярод якіх былі моладзь і пажылыя з розных краін свету, раздзялілі святочны абед за сталамі, накрытымі чырвонымі абрусамі. Святочнае меню ўключала лазанью, смажаную ялавічыну з бульбяным пюрэ, садавіну і традыцыйныя італьянскія слодычы.
