У Ватыкане прайшоў паказ фільма “The Chosen: Апошняя Вячэра”

Аляксандр Панчанка - Vatican News

У спецыяльным ватыканскім паказе, які папярэднічаў сусветнай прэм’еры новага сезону серыяла, прыняла ўдзел амерыканская актрыса Элізабэт Тэбіш, выканаўца ролі Марыі Магдалены.

“The Chosen” (“Выбраны”) – адзін з самых папулярных серыялаў у свеце, перакладзены на 50 моў. Ён расказвае пра жыццё Езуса Хрыста, апосталаў і людзей, якія іх акружалі. Яго рэжысёр, аўтар сцэнарыя і прадзюсар – Далас Джэнкінс.

Серыял ствараецца з 2017 года дзякуючы ахвяраванням. На гэты момант выйшла ўжо чатыры сезоны. Іх паглядзелі больш за 280 мільёнаў чалавек, а асобныя эпізоды набралі 900 мільёнаў праглядаў. На сацыяльныя сеткі серыяла падпісана больш за 17 мільёнаў чалавек.

“Гэты поспех сведчыць пра тое, што Святое Пісанне, і асабліва жыццё Езуса, застаюцца актуальнымі і сёння”, - адзначыў перад паказам у Ватыканскай фільматэцы мансеньёр Лусіа Адрыян Руіс, сакратар Дыкастэрыі па камунікацыі. Ён таксама падкрэсліў, што стужка дазваляе зацікавіць евангельскім пасланнем надзеі нават моладзь.