У Ватыканскіх садах асвечаны адрэстаўраваны літоўскі крыж

Літоўскі традыцыйны крыж, які стаіць у Ватыканскіх садах, быў асвечаны пасля рэстаўрацыі, праведзенай спецыялістамі Ватыканскіх музеяў. Цырымонія адбылася 3 сакавіка 2025 года пры ўдзеле прэзідэнта Літвы Гітанаса Наўседы.

Аляксандр Панчанка - Vatican News

Драўляны крыж вышынёй каля двух метраў, зроблены ў традыцыйнай літоўскай народнай тэхніцы, з’яўляецца дарам ксяндза Сымонаса Маркунаса, шматгадовага пробашча літоўскай парафіі святога Казіміра ў Аёве (ЗША).

Святар ахвяраваў і даслаў у Рым некалькі крыжоў з нагоды святкавання 600-годдзя хросту Літвы, якое адзначалася ў 1987 годзе. Тады ў Вечным горадзе праходзілі мерапрыемствы з удзелам каля дзвюх тысяч літоўцаў з дыяспары і невялікай групы духавенства з Літвы на чале з біскупам Антанасам Вайчусам. Крыжы, прывезеныя з ЗША, літоўская моладзь несла ў працэсіі падчас набажэнства Крыжовага шляху і ружанцовай малітвы за сваю Бацькаўшчыну.

Пасля ўрачыстасцей адзін з крыжоў быў перададзены арцыбіскупу Полу Марцынкусу, прастаршыні Папскай камісіі па справах Дзяржавы Ватыкан, і ўсталяваны ў Ватыканскіх садах.

Напярэдадні Юбілею 2025 года крыж быў адрэстаўраваны. Цырымонія асвячэння гэтага сімвала веры і вытрываласці літоўскага народа прайшла ў рамках агульнанацыянальнай пілігрымкі католікаў Літвы ў Рым, якая адбылася з 28 лютага па 4 сакавіка. У ёй брала ўдзел афіцыйная дэлегацыя на чале з прэзідэнтам Літвы Гітанасам Наўседам. Асвячэнне крыжа здзейсніў кардынал Раландас Макрыцкас, арцыпрэзбітар Базілікі Санта-Марыя-Маджорэ.