Статыстыка Касцёла: працягваецца рост колькасці католікаў
Аляксандр Панчанка - Vatican News
Новы папскі штогоднік утрымлівае інфармацыю аб Каталіцкім Касцёле за 2024 год. У гэты перыяд была створана адна мітраполія, тры біскупскія кафедры былі ўзнесены да рангу мітраполій, заснавана сем новых дыяцэзій, адна дыяцэзія стала архідыяцэзіяй, а адна Апостальская адміністратура – дыяцэзіяй.
З новага Annuarium Statisticum Ecclesiae вынікае, што колькасць католікаў у свеце ў перыяд з 2022 па 2023 год вырасла на 1,15 працэнта – з 1,390 да 1,406 мільярда вернікаў. У Афрыцы колькасць католікаў павялічылася на 3,31 працэнта і ў 2023 годзе складала каля 281 мільёна чалавек. Самыя “каталіцкія” краіны Чорнага кантынента – Дэмакратычная Рэспубліка Конга, Нігерыя, Уганда, Танзанія і Кенія.
47,8 працэнта католікаў Зямлі пражывае ў Амерыцы, пераважна ў Бразіліі, Аргенціне, Калумбіі і Парагваі. Колькасць ахрышчаных у гэтым рэгіёне вырасла на 0,9 працэнта.
У Азіі колькасць вернікаў павялічылася на 0,6 працэнта – тут пражывае каля 11 працэнтаў католікаў свету. Найбольш каталіцкія краіны рэгіёна – Філіпіны і Індыя.
У Еўропе католікі складаюць 20,4 працэнта ад сусветнай колькасці. Іх колькасць павялічылася на 0,2 працэнта. 90 працэнтаў католікаў кантынента пражывае ў Італіі, Польшчы і Іспаніі.
Колькасць біскупаў у свеце павялічылася з 5353 да 5430 (+1,4 працэнта). Святароў у 2023 годзе налічвалася 406 996, што на 734 чалавекі менш, чым у 2022 годзе. Пры гэтым у Афрыцы і Азіі колькасць духавенства расла (адпаведна +2,7 працэнта і +1,6 працэнта), а ў Еўропе, Акіяніі і Амерыцы скарачалася (адпаведна –1,6 працэнта, –1,0 працэнта і –0,7 працэнта).
Працягваецца рост колькасці пастаянных дыяканаў. У 2023 годзе іх было 51 433, што на 2,6 працэнта больш, чым годам раней (50 150). Найбольш пастаянных дыяканаў у Амерыцы і Еўропе (адпаведна 39 і 31 працэнт ад сусветнай колькасці).
Колькасць манахаў, якія не з’яўляюцца святарамі, і манахінь працягвае скарачацца на ўсіх кантынентах, акрамя Афрыкі. Колькасць законніц зменшылася на 1,6 працэнта (з 599 228 у 2022 годзе да 589 423 у 2023 годзе). На 1,8 працэнта скарацілася і колькасць семінарыстаў, за выключэннем Афрыкі, дзе іх стала больш на 1,1 працэнта ў параўнанні з папярэднім годам.
