Кардынал П'етра Паралін на пасяджэнні COMECE

ВАТЫКАН

Паралін біскупам ЕС: наш абавязак – быць з украінскім народам

“Клопат пра дабро ўласнай краіны, пра дабро Еўропы не вызваляе нас ад неабходнасці думаць пра дабро ўсяго чалавецтва і працаваць дзеля інтэгральнага развіцця ўсіх”, - адзначыў кардынал П’етра Паралін.

Ян Глінскі

Дзяржаўны сакратар Яго Святасці Папы прыняў удзел у адкрыцці пленарнага пасяджэння Камісіі Біскупскіх Канферэнцый Еўрапейскай Супольнасці (COMECE), што праходзіць у італьянскім мястэчку Немі, недалёка ад Рыма. Прадстаўнікі епіскапатаў краін ЕС сабраліся разам, каб разважаць над аднаўленнем унутранага адзінства Еўропы і яе імкненнем стаць глабальным гульцом у справе падтрымання міру.

Кардынал Паралін засяродзіўся на выкліках, што стаяць перад кантынентам, згадаўшы, між іншым, расійскую агрэсію супраць Украіны і яе наступствы, неабходнасць абароны рэлігійнай свабоды і важнасць дыялогу з усімі дзеля агульнага дабра.

“Наш абавязак – стаяць побач з украінскім народам, які пацярпеў ад несправядлівай агрэсіі, (…) і заклікаць ваюючыя бакі, а таксама ўсю міжнародную супольнасць прыкласці намаганні дзеля хуткага і справядлівага ўрэгулявання”, - падкрэсліў кардынал П’етра Паралін.

“Святы Пасад, а таксама COMECE, - дадаў іерарх, - неаднаразова выразна выказваліся адносна гэтага канфлікту, заклікаючы да спынення вайны шляхам перамоў, да справядлівага і трывалага міру, да павагі міжнароднага права і да сумесных намаганняў па аднаўленні гэтай пакутнай краіны”.

Прадстаўляючы тэму супрацоўніцтва паміж Апостальскай Сталіцай і COMECE, Дзяржаўны сакратар Яго Святасці закрануў пытанне прымянення Агульнага рэгламенту ЕС аб абароне даных. Гэта далікатная тэма, якая, між іншым, тычыцца свабоды веравызнання, у прыватнасці, абароны запісаў аб нараджэнні. “Адзін з абавязкаў біскупаў, - падкрэсліў іерарх, - гэта спрыянне будаўніцтву Еўропы, якая, паводле выказвання Папы Францішка, будзе “свецкай у здаровым сэнсе: дзе Бог і Цэзар паасобку, але не супрацьстаяць”.

Яшчэ адным выклікам, што стаіць перад кантынентам, кардынал Паралін назваў асэнсаванне яго палітычнай ролі ў зменлівым свеце. У прыватнасці, падыход новай адміністрацыі ЗША да знешняй палітыкі падрывае трансатлантычныя адносіны, што склаліся пасля 1945 года. Іерарх выказаў надзею, што Еўропа не паддасца “логіцы пераўзбраення”, што можа стаць “пралогам да закрытасці і новых канфліктаў”.

“Клопат пра дабро ўласнай краіны, пра дабро Еўропы не вызваляе нас ад неабходнасці думаць пра дабро ўсяго чалавецтва і працаваць дзеля інтэгральнага развіцця ўсіх”, - дадаў Дзяржаўны сакратар Яго Святасці.