Папскія дыпламаты правялі Ружанец аб здароўі Святога Айца

Увечары 16 сакавіка 2025 года Ружанец аб здароўі Папы ўзначаліў арцыбіскуп Сальваторэ Пенак’ё, старшыня Папскай касцельнай акадэміі – навучальнай установы, у якой праходзяць падрыхтоўку будучыя ватыканскія дыпламаты.

Аляксандр Панчанка - Vatican News

“Таксама і сёння, з гэтай плошчы, якая становіцца голасам свету, мы яднаемся з усім Божым народам у супольнай малітве аб хуткім выздараўленні Папы. Разам з настаяцелямі, навучэнцамі і выпускнікамі Папскай касцельнай акадэміі мы хочам стаць сведкамі клопату Святога Айца пра кожнага чалавека, выказваючы яго малітоўныя інтэнцыі аб міры паміж народамі, аблягчэнні пакут і адзінстве вернікаў”, - сказаў іерарх.

У малітве на Плошчы Святога Пятра прынялі ўдзел кардыналы, біскупы, святары, законніцы і законнікі, якія служаць у структурах Апостальскай Сталіцы і Рымскай дыяцэзіі, а таксама сотні свецкіх вернікаў. Ружанец прайшоў перад копіяй абраза Марыі, Маці Касцёла, старажытны арыгінал якой захоўваецца ў ватыканскай базыліцы.

На заканчэнне малітоўнай сустрэчы арцыбіскуп Пенак’ё прасіў Бога аб духоўным і цялесным здароўі для вернікаў, а Багародзіцу – аб захаванні ад зла, якое прыводзіць да смутку.

Ружанец аб выздараўленні Святога Айца праходзіць у Ватыкане з 24 лютага. Кожны вечар малітву ўзначальвае адзін з іерархаў Рымскай курыі. Яна распачынаецца а 19.30 па цэнтральнаеўрапейскім часе. Далучыцца духоўна да прысутных на Плошчы Святога Пятра можна з любой кропкі свету дзякуючы прамой трансляцыі, якую вядуць ватыканскія СМІ.