Кардынал Паралін: новая гонка ўзбраенняў вельмі небяспечная

Складаныя ваенна-палітычныя абставіны ў свеце прывялі да дэбатаў на тэму пашырэння ваеннага арсенала ў Еўропе. Святы Пасад заклікае да стрыманасці і асцерагае перад “рызыкоўнай і небяспечнай” гонкай узбраенняў.

Ян Глінскі

У інтэрв’ю для нямецкай выдавецкай групы “Bistumspresse” кардынал-дзяржсакратар П’етра Паралін нагадаў пра велізарны разбуральны патэнцыял сучаснай зброі і ўказаў на тое, што заканадаўчая база ўсё менш кантралюе яе выкарыстанне. Як падкрэсліў іерарх, сёння вайна выходзіць за межы ваеннага аспекту.

Прымяненне сучаснай зброі не варта разглядаць гэтак жа, як у эпоху традыцыйных узбраенняў. Таму таксама павінна быць перагледжана канцэпцыя “справядлівай вайны”. Адна справа “абараняцца ад зла, а іншая – дазволіць, каб яго логіка ўзяла над намі кантроль”.

Па словах дзяржсакратара, Апостальская Сталіца як суб’ект міжнароднага права прымяняе “дыпламатыю надзеі” і можа пераконваць толькі словамі. Бяссілле ж, якое часта пры гэтым адчуваецца, з’яўляецца “непрыемным пачуццём”, а няздольнасць спыніць войны і цярпенні выклікае “глыбокі смутак”.

Кардынал Паралін выказаў надзею, што ў вайне ва Украіне абедзве краіны знойдуць справядлівы і трывалы мір шляхам перамоваў.

Бліжэйшы супрацоўнік Папы нагадаў таксама пазіцыю Святога Пасаду адносна вайны ў сектары Газа: “Не будзе магчымым ніякае іншае рашэнне, акрамя дзвюх дзяржаў: Дзяржавы Ізраіль і Дзяржавы Палесціна, з асаблівым статусам Іерусаліма, які гарантуе міжнародная супольнасць”. Як дадаў кардынал Паралін, Папа адназначна асудзіў тэракт ХАМАС. Аднак “бойня і поўнае знішчэнне, якія адбыліся ў Газе” прывялі да “сур’ёзнага крызісу міжнароднага гуманітарнага права і выклікалі шмат сур’ёзных пытанняў да абодвух бакоў”.