Дзяржсакратар маліўся за Папу з пасламі пры Святым Пасадзе
Аляксандр Панчанка - Vatican News
Літургія прайшла раніцай 14 сакавіка 2025 года ў Капэле Паоліна Ватыканскага Апостальскага палаца. У гаміліі бліжэйшы супрацоўнік Святога Айца спаслаўся на словы з Евангелля святога Мацвея: “Калі справядлівасць ваша не пераўзыдзе справядлівасці кніжнікаў і фарысеяў, то вы не ўвойдзеце ў Валадарства Нябеснае” (5,20).
“Мы можам патлумачыць іх так: калі не выйдзеце за межы чалавечай логікі ў пошуку волі Бога, то ніколі не сустрэнеце Яго. Гэты пошук павінен быць скіраваны перадусім на павагу да іншых: мы пакліканы шукаць Божую волю найперш у нашых адносінах з бліжнімі, з тымі, хто знаходзіцца побач з намі. І гэтыя адносіны павінны грунтавацца на любові. Мы ведаем, што любоў да бліжняга – гэта праверка нашай любові да Бога”, - нагадаў іерарх.
Кардынал Паралін падкрэсліў, што Езус Хрыстус ставіў праявы гневу і вербальныя абразы на адзін узровень з забойствам. “Гэта можа здацца парадоксам, перабольшаннем, крайнасцю – але гэта праўда. Мы вельмі часта кажам: войны, што выбухаюць у свеце, якія заліваюць крывёй нашу планету і якія мы сваёй дыпламатычнай працай спрабуем прадухіліць, узнікаюць не на палях бітваў (...), а ўнутры нас. Яны нараджаюцца ў сэрцы чалавека, з пачуццяў нянавісці і варожасці, якія мы пестуем у адносінах да іншых. А пасля яны ўвасабляюцца ў паводзінах, пазначаных нянавісцю і варожасцю”, - сказаў Дзяржсакратар. Ён нагадаў, што для пошуку міру перш за ўсё неабходна “раззброіць мову” – пазбягаць агрэсіўнай і абразлівай лексікі, бо менавіта з яе пачынаюцца войны.
Кардынал Паралін таксама падкрэсліў, што Езус заклікае прымірыцца з ворагамі перад тым, як прыносіць ахвяры Богу. Для гэтага, паводле яго слоў, недастаткова проста папрасіць прабачэння – неабходна змяніць уласныя паводзіны. “Гаворка ідзе пра тое, каб перайсці ад логікі супрацьстаяння да добразычлівасці”, – патлумачыў іерарх, дадаўшы, што, каб быць здольнымі зрабіць гэта адразу, неабходна прасіць дапамогі ў Бога.
