Юбілей узброеных сіл, паліцыі і службаў бяспекі пачаўся ў Ватыкане

Аляксандр Панчанка - Vatican News

Раніцай 8 лютага 2025 года каля 30 тысяч вайскоўцаў і ахоўнікаў грамадскага парадку з больш чым ста краін свету пачалі здзяйсняць пілігрымку, каб прайсці праз Святую Браму ватыканскай Базілікі Святога Пятра.

У другой палове дня яны збяруцца на рымскай П’яца-дэль-Попала на канцэрце, арганізаваным Апостальскай Сталіцай у супрацоўніцтве з узброенымі сіламі Італіі. У нядзелю, 9 лютага, пілігрымы прымуць удзел у літургіі на Плошчы Святога Пятра ў Ватыкане, цэлебрацыю якой узначаліць Папа.

Дэвіз Юбілею ўзброеных сіл, паліцыі і службаў бяспекі – Без надзеі няма міру. Самая вялікая дэлегацыя на святкаванне прыбыла з Італіі – каля 20 тысяч чалавек.

Шырока прадстаўлены таксама Іспанія, ЗША, Славакія, Славенія, Украіна, Францыя, Бразілія, Харватыя, Калумбія, Парагвай, Інданезія, Аргенціна, Швейцарыя, Аўстрыя, Літва, Бельгія, Нідэрланды, Эквадор, Ірландыя, Аўстралія, Новая Зеландыя. У ініцыятыве бяруць удзел прадстаўнікі Папскай швейцарскай гвардыі, Ватыканскай жандармерыі і Ватыканскай пажарнай службы.

Прапрэфект Дыкастэрыі па евангелізацыі, арцыбіскуп Рына Фізікела, падчас прэзентацыі падзеі ў Ватыкане нагадаў, што мір патрабуе не толькі слоў, але таксама і канкрэтных і эфектыўных дзеянняў па яго забеспячэнні. У гэтым сэнсе важную ролю адыгрываюць вайскоўцы і работнікі праваахоўных органаў. “Юбілей дорыць надзею і адраджае яе ў сэрцах усіх, хто працуе ў імя міру і бяспекі. Няхай ён будзе прысвечаны ўсім народам, якія жывуць ва ўмовах вайны, каб страчаная вартасць была адноўлена для ўсіх”, - пажадаў ватыканскі іерарх.