Святы Пасад абвергнуў паведамленне італьянскіх СМІ адносна Папы

Зала Друку Святога Пасада выступіла з рэдкім афіцыйным абвяржэннем паведамлення, якое першапачаткова з’явілася ў італьянскіх СМІ, а потым было падхоплена іншымі.

Аляксандр Амяльчэня - Vatican News

Святы Пасад рашуча абверг інфармацыю пра сустрэчу Папы з кардыналамі П'етра Паралінам і Джанфранка Гірландам, якая нібыта адбылася ў клініцы Джэмэлі.

Паведамленне пра такую сустрэчу, якая, па меркаванні журналістаў, магла быць звязана з падрыхтоўкай дакументаў аб магчымай адстаўцы Пантыфіка, першапачаткова з'явілася на дзяржаўным тэлеканале RAI News 24, але пазней было выдалена.

Францішак знаходзіцца ў рымскай клініцы Джэмэлі, дзе праходзіць лячэнне. Кардынал Паралін займае пасаду дзяржаўнага сакратара, а кардынал Гірланда, езуіт, з'яўляецца адным з вядучых экспертаў па пытаннях касцельнага права.