Успамін Маці Тэрэзы ўнесены ў Рымскі каляндар

Марыя Валодзіна - Vatican News

Маці Тэрэза, якая прысвяціла жыццё служэнню самым бедным, была кананізавана Францішкам 4 верасня 2016 года. У дэкрэце Дыкастэрыі Божага культу і дысцыпліны сакрамэнтаў адзначаецца, што яна застаецца “крыніцай надзеі для многіх людзей, якія шукаюць суцяшэння, пакутуючы целам і духам". Святая Тэрэза з Калькуты стала ўвасабленнем прынцыпу евангельскага служэння: “Хто хоча быць большым сярод вас, няхай будзе вам слугою" (Мк 10, 43).

У дэкрэце паведамляецца, што ўспамін Маці Тэрэзы будзе ўключаны ва ўсе літургічныя календары і кнігі. Пераклады літургічных тэкстаў павінны быць зацверджаны ватыканскай дыкастэрыяй і апублікаваны біскупскімі канферэнцыямі.

Маці Тэрэза нарадзілася 26 жніўня 1910 года ў Скоп'е. У 1929 годзе пачала сваю місію ў Калькуце. Заснавала Кангрэгацыю місіянерак міласэрнасці, якая сёння налічвае больш за шэсць тысяч сясцёр і дзейнічае ў 130 краінах свету. За сваю дабрачынную працу атрымала Нобелеўскую прэмію міру ў 1979 годзе, прысвяціўшы яе бедным Індыі. Памерла ў Калькуце ў 1997 годзе. Папа Ян Павел II, з якім яе звязвала братэрскае сяброўства, беатыфікаваў Маці Тэрэзу ў 2003 годзе, а Папа Францішак, які ніколі не хаваў свайго захаплення гэтай вялікай святой, кананізаваў яе ў 2016 годзе падчас Юбілею Міласэрнасці.