Сінод: як зрабіць службу нунцыяў больш душпастырскай
Аляксандр Амяльчэня - Vatican News
Сакратарыят Сінода апублікаваў інфармацыю аб дзейнасці спецыяльнай групы, якая займаецца вывучэннем ролі папскіх прадстаўнікоў у місіянерскай сінадальнай перспектыве. На працягу апошніх дзён група правяла тры вэбінары з нунцыямі, якія працуюць на розных кантынентах.
Душпастырскі характар паслугі нунцыяў
Сустрэчы праходзілі пад кіраўніцтвам кардынала Марыа Грэка, генеральнага сакратара Сінода, і кардынала Освальда Грасіяса, арцыбіскупа-эмерыта Бамбея, каардынатара групы. У яе склад таксама ўваходзяць арцыбіскуп Антоніа Гвіда Філіпацы, апостальскі нунцый у Польшчы; ксёндз Джозэф Мэрфі, падсакратар па дыпламатычным персанале Апостальскай Сталіцы (які ўдзельнічае ад імя арцыбіскупа Лучана Руса, сакратара па папскіх прадстаўніцтвах); а таксама прафесар Мірыям Вейленс, выкладчвца кананічнага права ва Універсітэце Эрфурта (Германія).
У сустрэчах прынялі ўдзел больш за восемдзесят апостальскіх нунцыяў, некаторыя з якіх былі прадстаўлены або падтрыманы сваімі сакратарамі ці дарадцамі нунцыятур.
Пошук новага стылю распазнання
Падчас вэбінараў кожнага ўдзельніка папрасілі падзяліцца сваімі ўражаннямі аб паслузе папскіх прадстаўніцтваў у сінадальным і місіянерскім Касцёле. Нягледзячы на выключную разнастайнасць мясцовых сітуацый, існавала згода адносна неабходнасці вызначэння ў больш душпастырскім сэнсе паслугі нунцыяў для мясцовых Касцёлаў і епіскапатаў, а таксама ўмацавання стылю супольнага распазнання ў працы нунцыятуры.
Такія дыскусіі з'яўляюцца часткай шырэйшага працэсу, накіраванага на абнаўленне ролі папскіх прадстаўнікоў у адпаведнасці з сінадальным падыходам, які прасоўвае Папа Францішак.
