Касцёл адкрыты для ўсіх: кардынал Таленціна пра місію творцаў

Аляксандр Амяльчэня - Vatican News

Падчас прэс-канферэнцыі, прысвечанай Юбілею дзеячаў культуры, які пройдзе ў Рыме з 15 па 18 лютага 2025 года, кардынал Таленціна адзначыў важнасць прысутнасці Касцёла ва ўсіх сферах жыцця грамадства. Ён пракаментаваў відэазварот Францішка на фестывалі ў Санрэма, падкрэсліўшы паслядоўнасць пазіцыі Пантыфіка.

Свет мае патрэбу ў таленце і пакліканні мастакоў

"Тое, што Папа сказаў учора [на фестывалі ў Сан-Рэма], ён казаў і ў Венецыі на Біенале, і паўтарае паўсюль. Вялікі і шырокі свет з'яўляецца месцам для слова і абвяшчэння, і Францішак сапраўды з'яўляецца настаўнікам у абвяшчэнні хрысціянства, несучы гэтае пасланне міру, міжкультурнага суіснавання і блізкасці да тых, хто пакутуе", - падкрэсліў кардынал.

Надзея – гэта неабходны і магутны рэсурс

Паводле інфармацыі, агучанай у ватыканскай прэс-зале, у Юбілеі мастакоў возьмуць удзел больш за 10 тысяч чалавек са 100 краін пяці кантынентаў. Праграма пачнецца 15 лютага 2025 года з юбілейнай аўдыенцыі Папы, пасля чаго адбудзецца сустрэча Sharing Hope у супрацоўніцтве з Ватыканскімі музеямі і прадстаўнікамі вядучых культурных устаноў.

"Мы павінны прыслухоўвацца да таго, што розныя культуры кажуць пра надзею", - падкрэсліў кардынал Таленціна, называючы надзею "рэсурсам першай неабходнасці, а не проста нечым дадатковым". Ён таксама адзначыў важнасць пошуку новых форм перадачы духоўнай і культурнай спадчыны рэлігій праз сучаснае мастацтва.