ВАТЫКАН

Галоўны дыпламат Святога Пасада крытыкуе еўрапейскую палітыку

Кардынал-дзяржсакратар П'етра Паралін заявіў, што Еўропа пакутуе ад канцэптуальнай слабасці і страты сваіх гістарычных каранёў у сучасным свеце.

Аляксандр Амяльчэня - Vatican News

Галоўны дыпламат Святога Пасада выказаў сваё меркаванне пра сучасны стан Еўропы ў інтэрв'ю італьянскай газеце Eco di Bergamo. Паводле яго слоў, нягледзячы на наяўнасць "добрых антыцелаў" для супрацьстаяння крызісам, еўрапейскай супольнасці не хапае выразнай канцэпцыі будучыні.

“Еўропа мае глыбокі, часткова апраўданы, страх перад уласным мінулым”

Паводле слоў кардынала Параліна, еўрапейскі кантынент сёння знаходзіцца ў складанай сітуацыі, калі яго нежаданне прызнаваць усю паўнату сваёй гістарычнай спадчыны перашкаджае будаваць моцную будучыню. "Побач з цёмнымі старонкамі ў еўрапейскай гісторыі ёсць значна больш светлых момантаў," - падкрэслівае ён.

Дыпламат адзначае, што гэты страх праявіўся ў момант стварэння еўрапейскай канстытуцыі, калі было прынята рашэнне пазбегнуць прамога ўпамінання юдэйска-хрысціянскіх каранёў Еўропы. Замест гэтага была выкарыстана больш агульная фармулёўка пра культурную, гуманістычную і рэлігійную спадчыну.

Па меркаванні Дзяржсакратара Яго Святасці, такі падыход да ўласнай гісторыі і традыцый аслабляе здольнасць Еўропы эфектыўна рэагаваць на сучасныя выклікі. Толькі прыняўшы сваю гісторыю цалкам, з усімі яе дасягненнямі і памылкамі, Еўропа зможа выпрацаваць моцную пазіцыю ў сучасным геапалітычным кантэксце.

“Будучыню можна будаваць толькі на падмурку мінулага”

На думку кардынала Параліна, адмова ад сваёй укаранёнай у гісторыі ідэнтычнасці аслабіла пачуццё прыналежнасці да агульнага інтэграцыйнага праекта і еўрапейскай ідэнтычнасці сярод народаў кантынента. Замест таго, каб будаваць Еўропу на глыбокіх агульных падмурках і каранях, быў абраны шлях зменлівага каштоўнаснага кансэнсусу.

Кардынал Паралін падкрэсліў, што для паспяховага вырашэння сучасных выклікаў у сферах культуры, міграцыі і гандлю Еўропе неабходна нанова адкрыць сваю ідэнтычнасць, каб эфектыўна ўдзельнічаць у сучасных геапалітычных працэсах.

Блізкі супрацоўнік Пантыфіка перакананы, што без прымірэння з уласным мінулым і прызнання сваіх гістарычных каранёў, Еўропа рызыкуе застацца без трывалага падмурка для будаўніцтва будучыні.