Дзесяць сінадальных груп падвялі вынікі працы ў Ватыкане
Аляксандр Амяльчэня - Vatican News
Сустрэча пачалася з малітвы за хуткае выздараўленне Святога Айца. Падчас мерапрыемства кожны з каардынатараў прадставіў справаздачу аб працы сваёй групы, падрабязна спыніўшыся на выкарыстаных метадах, удзельніках і часовых рамках завяршэння даследаванняў.
Айцец Джакама Коста, кансультант Генеральнага сакратарыята, падкрэсліў неабходнасць захавання аднастайнасці ў афармленні і прадстаўленні справаздач групамі даследавання.
Кардынал Марыа Грэк нагадаў удзельнікам сустрэчы пра магчымасць атрымання дадатковых прапаноў праз электронную пошту synodus@synod.va да 31 сакавіка 2025 года, як было абвешчана на адкрыцці Другой сесіі XVI Звычайнай Генеральнай Асамблеі Сінода Біскупаў.
Варта адзначыць, што дзесяць даследчых груп былі створаны ў сакавіку 2024 года пасля выдання Папам Францішкам спецыяльнага дакумента аб супрацоўніцтве паміж дыкастэрыямі Рымскай курыі і Генеральным сакратарыятам Сінода. У лісце да кардынала Марыа Грэка Пантыфік даручыў яму забяспечыць працу груп "згодна з сапраўдным сінадальным метадам".
Кананічная камісія выказала гатоўнасць суправаджаць працу, асабліва ў пытаннях, якія датычацца згоднасці зместу, прадстаўленага даследчымі групамі, з Кананічным правам Касцёла. Усе новыя прапановы, якія паступяць да вызначанага тэрміну, будуць неадкладна перанакіраваны сакратарам адпаведных груп для далейшага разгляду.
