Ватыканіст пра экуменічныя акцэнты Юбілею 2025 года
Ян Глінскі
Паводле журналіста, Папа Францішак і Патрыярх Канстанцінопальскі Барталамей І накіруюцца ў Нікею 24 мая 2025 года, дзе прымуць удзел у святкаванні юбілею першага Сусветнага сабору. У публікацыі паведамляецца таксама пра верагоднасць першага ў гісторыі папскага візіту ў Бялград.
Гальярдучы адначасова ўказвае на экуменічныя пытанні ў вельмі балючых для Апостальскай Сталіцы канфліктах ва Украіне і ў Святой Зямлі. Напружанне ва Украіне назіраецца ад моманту надання Канстанцінопалем незалежнага статусу Праваслаўнай Царкве Украіны ў 2018 годзе, што прывяло да выхаду Маскоўскага Патрыярхату з экуменічных кантактаў пад кіраўніцтвам або сукіраваннем Канстанцінопаля.
Праваслаўны раскол, які цягнецца з 2018 года, закрануў і Афрыку, дзе ў 2021 годзе Маскоўскі патрыярхат стварыў два экзархаты для праваслаўных, якія не падтрымалі рашэнне Александрыі аб прызнанні ўкраінскай аўтакефаліі. Дадзеная сітуацыя выяўляе, як сутыкаюцца паміж сабой геапалітыка і рэлігійная палітыка, бо стварэнне экзархатаў закранае стратэгічныя інтарэсы Расіі.
Як адзначыў Гальярдучы, у 2025 годзе працягнецца таксама праца над новай рэдакцыяй Экуменічнай хартыі, якая павінна быць падпісана ў Вільні ў 2026 годзе. У межах працы над дакументам было вылучана 55 абавязкаў (раней 26), у тым ліку супольная малітва аб адзінстве. Нагадаем, у версіі 2001 года ў дакуменце гаварылася толькі пра неабходнасць “маліцца адзін за аднаго аб адзінстве хрысціян”. Над дакументам працуюць прадстаўнікі розных Цэркваў; камісію ад Каталіцкага Касцёла ўзначальвае польскі кардынал Гжэгаж Рысь.
Паводле ватыканіста, у 2025 годзе, між іншым, можна чакаць далейшага развіцця дакументаў аб прымаце і сінадальнасці ў другім і першым тысячагоддзях, распрацаваных Сумеснай міжнароднай камісіяй па тэалагічным дыялогу паміж Каталіцкім Касцёлам і Праваслаўнай Царквой, а таксама далейшага развіцця дакумента аб разуменні першынства Біскупа Рыма, апублікаванага ў мінулым годзе.
