У Ватыкане прайшла прэзентацыя саміту па правах дзяцей

Марыя Валодзіна - Vatican News

28 студзеня 2025 года ў Зале друку Святога Пасада прайшла прэзентацыя Сусветнага саміту па правах дзяцей. Падзея, якая атрымала назву Любім і абараняем дзяцей, была абвешчана Францішкам на агульнай аўдыенцыі 20 лістапада 2024 года. У той жа дзень быў створаны і Папскі камітэт па падрыхтоўцы Сусветнага дня дзяцей.

У прэс-канферэнцыі бралі ўдзел старшыня камітэта, айцец Энца Фартуната, і віцэ-старшыня Альда Каньёлі, а таксама прадстаўнікі арганізацый, якія супрацоўнічаюць з Святым Пасадам у арганізацыі саміту: старшыня Супольнасці святога Эгідзія Марка Імпальяца і заснавальнік сацыяльнага кааператыва Auxilium Анджэла К’яраца. Падчас прэзентацыі трансліраваўся відэазварот індыйскага актывіста і лаўрэата Нобелеўскай прэміі міру 2014 года Кайлаша Сацьярці, вядомага сваёй прыхільнасцю барацьбе са злоўжываннямі і эксплуатацыяй дзіцячай працы.

Плануецца, што ўдзельнікі саміту вызначаць новыя стратэгіі для абароны дзяцей ад голаду, няроўнасці, войнаў і злоўжыванняў, будуць спрыяць міжнароднаму супрацоўніцтву для забеспячэння больш бяспечнай і справядлівай будучыні для маладога пакалення. Дзесяць маленькіх прадстаўнікоў розных кантынентаў уручаць Папе Францішку пасланне ад імя мільёнаў дзяцей свету.

У мерапрыемстве прымуць удзел такія сусветна вядомыя асобы, як каралева Іарданіі Ранія, амерыканскі палітык і актывіст-эколаг Ал Гор, былая прэзідэнт Інданезіі Мегаваці Сукарнапутры, Вялікі імам Аль-Азхара шэйх Аль-Таеб, былы старшыня Еўрапейскага цэнтральнага банка Марыё Драгі, італьянскі сенатар Ліліяна Сэгрэ, старшыня Міжнароднага алімпійскага камітэта Томас Бах, пісьменніца Эдзіт Брук, старшыня Інтэрпола Ахмед Насер Аль-Раісі і іншыя.

Саміт будзе трансліравацца ў прамым эфіры ватыканскімі медыя.