У Базіліцы Святога Паўла па-за мурамі адчынілі Святую Браму
Марыя Валодзіна - Vatican News
Падзея адбылася падчас ранішняга эўхарыстычнага набажэнства. У сваёй гаміліі іерарх падкрэсліў асаблівую важнасць радасці і надзеі, з якімі вернікі пераступаюць парог храма. “Радасць і надзея – гэта біном сённяшняй літургіі”, - сказаў кардынал Харві, дадаючы, што радасць звязана з нараджэннем Збаўцы, а надзея – з упэўненасцю ў Хрысце.
Хрысціянская надзея асабліва важная ў сучасным свеце, які пакутуе ад шматлікіх трагедый, наступстваў пандэміі, войнаў і іншых крызісаў. Спасылаючыся на словы Бэнэдыкта XVI і Папы Францішка, іерарх патлумачыў, што хрысціянская надзея – гэта не пустое слова або нявызначанае жаданне, каб усё было добра. Гэта ўпэўненасць, заснаваная на вернасці Бога сваім абяцанням. Надзея называецца тэалагічнай цнотай, таму што яна напоўнена Богам і мае Бога ў якасці гаранта. Гэта не пасіўная цнота, якая проста чакае, пакуль нешта адбудзецца, а вельмі актыўная цнота, якая дапамагае падзеям адбывацца, сказаў іерарх.
Юбілей 2025 года, як і кожны Святы год, дае вернікам магчымасць далучыцца да тысячагадовай традыцыі Касцёла: стаць пілігрымамі. Вечны горад рыхтуецца прыняць пілігрымаў з усяго свету, прапануючы ім асаблівы дар ласкі, пакаяння, навяртання і даравання грахоў. “Касцёл заклікае кожнага пілігрыма адправіцца ў духоўнае падарожжа па слядах веры і шчыра жадае, каб ён адрадзіў у сэрцы факел надзеі”, - сказаў архіпрэзбітэр папскай базілікі. Ён нагадаў, што вялікі крыж на франтоне храма, у якім захоўваецца рэліквія святога Паўла, апостала і пакутніка, мае лацінскі надпіс Spes unica (Адзіная надзея). Ён нагадвае вернікам пра перамогу Хрыста над грахом і смерцю.
Папа Францішак заклікае вернікаў не проста мець надзею, але і дзяліцца ёю з іншымі, “выпраменьваць яе, быць сейбітамі надзеі” для ўсяго чалавецтва. Гэта самы цудоўны дар, які Касцёл можа зрабіць чалавецтву, асабліва ў гэты момант гісторыі, - завяршыў гамілію кардынал Харві.
