Папа зацвердзіў шэсць дэкрэтаў Дыкастэрыі па справах кананізацыі

Падчас аўдыенцыі для кардынала Марчэла Семерара Францішак зацвердзіў шэсць дэкрэтаў аб прызнанні цуду, пакутніцкай смерці і гераічных цнотаў.

Аляксандр Амяльчэня - Vatican News

27 студзеня 2025 года Святы Айцец прыняў на аўдыенцыі прэфекта Дыкастэрыі па справах кананізацыі, і даў дазвол на абвяшчэнне шасці дэкрэтаў.

Першы дэкрэт датычыць прызнання цуду, здзейсненага праз заступніцтва італьянскай благаслаўлёнай Вінчэнцы Марыі Палоні, заснавальніцы Інстытута Сясцёр Міласэрнасці (1802-1855).

Два дэкрэты пацвярджаюць пакутніцкую смерць за веру (in odium fidei) Божых слугаў: Пятра да Корпа і чатырох яго паплечнікаў з Ордэна Братоў Меншых, забітых у верасні 1597 года на тэрыторыі сучаснай Джорджыі (Злучаныя Штаты Амерыкі), якая тады была часткай Фларыды, і брата Лікарыёна Мэя з Інстытута Марыстаў, забітага 27 ліпеня 1909 года ў Барселоне.

Тры апошнія дэкрэты прызнаюць гераічныя цноты Божых слугаў: Марыі Рыкарды ад Найкаштоўнейшай Крыві (1887-1966), абатысы Ордэна Найсвяцейшага Збаўцы святой Брыгіты; італьянскага святара-пустэльніка Квінціна Сікуры (1920-1968) і італьянскай свецкай верніцы Луіджыі Сінапі (1916-1978).