Кардынал Рошэ: Касцёл у чаканні важных літургічных выданняў
Ян Глінскі
Кардынал Артур Рошэ прадставіў новыя выданні, якія з’яўляюцца чарговым крокам у рэалізацыі літургічнай рэформы, распачатай Другім Ватыканскім Саборам.
У інтэрв’ю для ватыканскіх СМІ іерарх адзначыў, што ў падрыхтоўцы дадатку (Supplementum) да Літургіі гадзінаў прымалі ўдзел вядомыя спецыялісты. Сам праект працягваўся некалькі дзесяцігоддзяў. Дадатак складаецца з трох частак: “Двухгадовага цыкла біблейскіх і патрыстычных чытанняў”, Lectionarium ad libitum (факультатыўных чытанняў) і Orationes super psalmos et cantica (факультатыўных малітваў да псальмаў і біблейскіх песень).
Як патлумачыў прэфект кангрэгацыі, новае выданне Літургіі гадзінаў, у адрозненні ад тыповага, прадугледжвае не гадавы, а двухгадовы цыкл чытанняў. Падборка дадатковых тэкстаў, падзеленых на адпаведныя літургічныя перыяды, прапануе чытанні не толькі Айцоў Касцёла, але таксама тэксты святых і благаслаўлёных сярэднявечча і пазнейшых часоў. Бо, як дадаў кардынал Рошэ, “малітвы да псальмаў і песень” павінны “дапамагаць тым, хто чытае псальмы, інтэрпрэтаваць іх перш за ўсё ў хрысціянскім сэнсе”.
Кажучы пра Рымскі мартыралог (Martyrologium Romanum), іерарх указаў на спецыфіку працы над гэтай літургічнай кнігай, якая патрабуе рэгулярнага абнаўлення. “Апошняе выданне было ў 2004 годзе, – адзначыў кардынал Рошэ. – За апошнія 20 гадоў не толькі павялічылася колькасць святых і благаслаўлёных, але і наша дыкастэрыя атрымала заўвагі і просьбы адносна гістарычных, геаграфічных ці прасапаграфічных тлумачэнняў, якія былі прадметам стараннага даследавання”.
Прэфект Кангрэгацыі па справах Божага культу і Дысцыпліны сакрамэнтаў перакананы, што гэтыя кнігі даюць шмат магчымасцяў для Касцёла: ад адкрыцця нанова багацця літургіі гадзінаў, да магчымасці завяршыць літургічную рэформу, распачатую Другім Ватыканскім Саборам.
