Юбілей СМІ ў Ватыкане сабраў рэкордную колькасць удзельнікаў

Аляксандр Амяльчэня - Vatican News

Юбілей свету СМІ, які праходзіць 24-25 студзеня 2025 года ў Ватыкане, стаў рэкордным па колькасці ўдзельнікаў. Пра гэта паведаміў прапрэфект Дыкастэрыі па справах евангелізацыі, арцыбіскуп Рына Фізікела.

"Усё значна перавысіла нашы чаканні. Мы рыхтаваліся прыняць каля 6 тысяч чалавек, але ў выніку іх аказалася амаль 10 тысяч", - падкрэсліў іерарх у размове з журналістамі.

Такая вялікая колькасць удзельнікаў стварыла пэўныя лагістычныя складанасці, паколькі Зала Паўла VI, дзе запланавана сустрэча з Папам Францішкам, можа змясціць толькі 7 тысяч чалавек. Аднак арганізатары знайшлі выйсце: усе змогуць удзельнічаць у сустрэчы дзякуючы ўсталяваным тэлеэкранам.

"Выбар даты правядзення Юбілею СМІ не выпадковы. Гэта не толькі супадзенне з літургічным успамінам святога Францішка Сальскага, заступніка журналістаў, які адзначаецца 24 студзеня. Мы хочам, каб журналісты самі перажылі Юбілей, каб потым яны маглі больш аўтэнтычна распавядаць пра яго іншым", - патлумачыў арцыбіскуп Фізікела.

Удзельнікі Юбілею Свету Камунікацыі на чале з Паўла Руфіні, прэфектам Дыкастэырі па камунікацыі, у пілігрымцы да Святой Брамы

На фоне сусветнага крызісу традыцыйных медыя і ўзрастання ўплыву глабальных медыйных платформаў, пра што папярэджвае Папа Францішак у сваім нядаўнім пасланні на Сусветны дзень сацыяльнай камунікацыі, Юбілей свету СМІ набывае асаблівае значэнне.

Праграма Юбілею ўключае шэраг важных падзей. 24 студзеня ўвечары ўдзельнікі сабраліся ў базіліцы святога Яна на Латэране для ўдзелу ў пакаянным набажэнстве і святой Імшы, якую ўзначаліў генеральны вікарый Рымскай дыяцэзіі, кардынал Бальдасарэ Рэіна. 25 студзеня раніцай яны прайшлі праз Святую Браму ватыканскай базілікі і прамовілі Вызнанне веры ля магілы святога Пятра. Пасля сустрэчы з Папам Францішкам у Зале Паўла VI, увечары запланаваны мерапрыемствы ў розных месцах Рыма пад агульнай назвай Дыялог з горадам.

Адной з ключавых падзей стала дыскусійная панэль з удзелам лаўрэаткі Нобелеўскай прэміі міру, філіпінскай журналісткі Марыі Рэсы і ірландскага пісьменніка і журналіста Колума Макана.

Асаблівую ўвагу прыцягнула праграма Uniting Communicators For a Shared Journey, якая рэалізуецца ў рамках Юбілею свету СМІ. У ёй бяруць удзел 150 маладых спецыялістаў па камунікацыі з больш чым 60 краін, якія імкнуцца стварыць атмасферу для пераадолення культурных і прафесійных бар'ераў і стварыць аўтэнтычны дыялог.