Папа надаў біскупскую годнасць былому сакратару нунцыятуры ў Мінску

12 студзеня 2025 года Папа Францішак прызначыў новага сакратара Дыкастэрыі па справах культуры і адукацыі, а таксама надаў біскупскую годнасць падсакратару Дыкастэрыі па справах Усходніх Цэркваў.

Аляксандр Панчанка - Vatican News

Сакратаром Дыкастэрыі па справах культуры і адукацыі стаў мансеньёр Карла Марыя Пальвані, які раней займаў пасаду падсакратара гэтай ватыканскай установы. Святы Айцец надаў яму таксама тытул арцыбіскупа.

Біскупскую годнасць Папа надаў мансеньёру Філіпа Чампанэлі, падсакратару Дыкастэрыі па справах Усходніх Цэркваў. Да прызначэння ў гэту структуру Рымскай курыі ён працаваў на дыпламатычнай службе. З 2011 па 2015 год мансеньёр Чампанэлі быў сакратаром Апостальскай нунцыятуры ў Беларусі, а з 2015 па 2024 год займаў пасаду супрацоўніка Секцыі па агульных справах Дзяржаўнага сакратарыята.