Святы Айцец прызначыў старшыню Трыбунала Дзяржавы Ватыкан

Папа Францішак прызначыў прафесара Венеранда Марана новым старшынёй Трыбунала Дзяржавы Ватыкан. Аб гэтым 28 снежня 2024 года паведаміла Зала Друку Святога Пасаду.

Аляксандр Панчанка - Vatican News

Новы старшыня выкладае кананічнае права ў Рымскім універсітэце Тор-Вергата, дзе займае пасаду кіраўніка юрыдычнага дэпартамента. Марана супрацоўнічае з італьянскім епіскапатам і рознымі каталіцкімі навучальнымі ўстановамі, з’яўляецца аўтарам шэрагу навуковых публікацый на тэму касцельнага права.

У студзені 2024 года Папа прызначыў эксперта намеснікам старшыні Трыбунала Дзяржавы Ватыкан. У гэтай якасці ён прымаў удзел у судовым працэсе па справе фінансавых злоўжыванняў у Ватыкане, звязаным з набыццём элітнай нерухомасці ў Лондане.

Венеранда Марана прыступіць да сваіх абавязкаў 1 студзеня 2025 года. Ён зменіць на пасадзе старшыні Трыбунала Дзяржавы Ватыкан Джузэпэ Піньятонэ, адстаўку якога Папа Францішак прыняў 11 снежня ў сувязі з дасягненнем ім узроставага абмежавання, устаноўленага для службовых асоб ватыканскай судовай сістэмы.