Папа прыняў лаўрэатаў Прэміі Ратцынгера

30 лістапада 2023 года Францішак прыняў на аўдыенцыі сёлетніх лаўрэатаў Прэміі Ратцынгера, двух іспанскіх тэолагаў: ксяндза Пабла Бланка Сарта з Навары і прафесара Франсеска Туральба Расэльё з Барселоны.

Аляксандр Амяльчэня - Vatican News

Сама цырымонія ўзнагароджання прайшла 30 лістапада вечарам. Ад імя Папы ўзнагароду ўручыў у Sala Regia Апостальскага палаца кардынал Дзяржсакратар П'етра Паралін.

Імкненне да таго, каб “рухацца ў высокім палёце з двума адкрытымі крыламі розуму і веры, але заўсёды з пакорай, стараннем і настойлівасцю”. Гэта спадчына, “жывая і плённая на будучым шляху Касцёла”, якую Бэнэдыкт XVI пакідае менш чым праз год пасля сваёй смерці, - падкрэсліў бліжэйшы супрацоўнік Францішка.

Ксёндз Пабла Бланка Сарта з’яўляецца чальцом рэдакцыйнай рады па выданні поўнага збору твораў Ёзэфа Ратцынгера на іспанскай мове і аўтарам шматлікіх даследаванняў і выданняў, прысвечаных жыццю, вучэнню і дзейнасці Бэнэдыкта XVI.

Франсеск Туральба Расэльё – свецкі вернік і бацька пяці дзяцей – сваю педагагічную дзейнасць ў некалькіх навучальных установах Іспаніі і ЗША сумяшчае з пісьменніцкай працай і папулярызацыяй ідэй, якія тычацца філасофскай антрапалогіі і этыкі.

Прэмія Ратцынгера ўручаецца з 2010 года. Эксперты называюць яе Нобелеўскай прэміяй у галіне тэалогіі. Ініцыятарам узнагароды з’яўляецца Ватыканскі фонд імя Ёзэфа Ратцынгера – Бэнэдыкта XVI. Яго стварыў сам Пантыфік і ахвяраваў у яго даходы ад сваёй літаратурна-тэалагічнай дзейнасці. Падтрымліваюць Фонд і дабрачынцы.