Дзяржсакратар патэлефанаваў Прэм’ер-міністру Палестыны

14 кастрычніка 2023 года кардынал П’етра Паралін правёў тэлефонную размову з Прэм’ер-міністрам Палестыны. Днём раней ён здзейсніў візіт у пасольства Ізраіля пры Апостальскай Сталіцы.

Аляксандр Панчанка - Vatican News

Зала Друку Святога Пасаду паведаміла, што Дзяржаўны Сакратар Яго Святасці Папы патэлефанаваў Прэм’ер-міністру Дзяржавы Палестына Мухамеду Штае, якому выказаў смутак Святога Пасаду і яго супрацоўнікаў з прычыны таго, што адбываецца ў Палестыне, асабліва ў Газе.

Ватыканскі іерарх запэўніў, што Святы Пасад і надалей будзе прызнаваць Дзяржаву Палестына і яе ўлады адзінымі выразнікамі законных памкненняў палестынскага народа. Ён падкрэсліў, што ў актуальнай сітуацыі неабходна забяспечыць поўную павагу да гуманітарнага права і не дазволіць уцягнення ў канфлікт грамадзянскага насельніцтва, асабліва найбольш уразлівых людзей, медыцынскіх устаноў і месцаў культу. Пра гэта ж днём раней кардынал Паралін рашуча заявіў усім зацікаўленым бакам.