Кардынал Сандры: трэба захаваць літургічную спадчыну Усходу
Ян Глінскі - Vatican News
Кардынал Леанарда Сандры выступіў падчас адкрыцця сімпозіума, арганізаванага да 25-годдзя інструкцыі Il Padre incomprensibile на тэму выкарыстання літургічных прадпісанняў Кодэкса Канонаў Усходніх Цэркваў. Мэта дакумента, падпісанага 6 студзеня 1996 г. тагачасным прэфектам кангрэгацыі кардыналам Акіле Сільвестрыні і сакратаром арцыбіскупам Міраславам Марусіным, заключаецца ў практычным прымяненні літургічных норм у святле палажэнняў Кодэкса Канонаў Усходніх Касцёлаў ад 1991 г.
Гэтай супольнай спадчыне Усходу і Захаду пагражае знікненне з прычыны міграцыі ўсходніх хрысціян, якія прыбываюць на Захад, дзе пераважае лацінская традыцыя, зліваюцца там з іншым асяроддзем, у тым ліку касцёльным, і такім чынам страчваюць сваю ідэнтычнасць.
Кардынал Сандры нагадаў, што ўсходнія Каталіцкія Касцёлы належаць да адной з пяці ўсходніх літургічных традыцый: александрыйскай, канстанцінопальскай (візантыйскай), сіраантыяхійскай, сірыйска-ўсходняй і армянскай.
Па словах ватыканскага іерарха, істотным элементам гэтай сустрэчы стаў удзел у ёй арцыбіскупа Ёва (Геча) з Канстанцінопальскага Патрыярхата, што заахвочвае да адказнай працы над супольным пагадненнем, каб развітацца з “небяспекай страты ўсходняй тоеснасці”.
У актуальным сцэнарыі, па словах кардынала Сандры, клопат пра гэтую спадчыну заклікае, з аднаго боку, душпастыраў лацінскага Касцёла “не абмяжоўвацца толькі агульнай “Імшой на арабскай мове”, сутыкаючыся з мноствам мігрантаў у сваіх краінах”, а з іншага – заклікае кіраўнікоў і айцоў усходніх Касцёлаў “не станавіцца залежнымі ад такой формы цэлебрацыі, як лацінская, нібы гэта адзіны – бо датычыць большасці – узор, да якога трэба імкнуцца”.
