Ватыкан

Бэнэдыкт XVI: ля вытокаў сведчання веры стаіць малітва

Бэнэдыкт XVI працягвае выконваць апостальскую місію адданай малітвай за Касцёл, застаючыся верным вучэнню, якое абвяшчаў на працягу свайго пантыфікату.

11 лютага 2019 г. мінула дакладна шэсць гадоў з дня, калі навіна аб намеры пакінуць Пятровае служэнне па прычынах здароўя і сталага ўзросту прагрымела на ўвесь свет.

Папа на пенсіі працягвае сваю місію, хоць і іншым чынам, але па-ранейшаму плённа і эфектыўна: жыццём, прысвечаным бесперапыннай малітве за Святога Айца Францішка, за Касцёл і Божы народ.

Пра важнасць малітвы Бэнэдыкт XVI нагадваў пастаянна на працягу свайго пантыфікату. Адна з запамінальных прамоў на гэтую тэму прагучала 8 жніўня 2012 г., падчас агульнай аўдыенцыі, прысвечанай катэхізацыі на ўзор св. Дамініка, заснавальніка Ордэна Дамініканаў. Тады Бэнэдыкт XVI пералічыў дзевяць спосабаў маліцца, якія практыкаваў св. Дамінік. Сярод іх – асабістая медытацыя, падчас якой малітва набывала асабліва інтымны, палкі і засяроджаны характар.

“Пасля Літургіі Гадзін і Эўхарыстыі св. Дамінік працягваў размову з Богам, не абмяжоўваючы сябе ў часе. Седзячы ў спакойным стане, ён збіраўся з думкамі, засяроджаны на слуханні, чытаючы Святое Пісанне або сузіраючы распяцце. (...) Такім чынам, ён праецыраваў на сябе рэчаіснасць веры”, - тлумачыў Бэнэдыкт XVI.

Іншы спосаб захавання кантакту з Богам – гэта малітва падчас падарожжаў. Перамяшчаючыся з аднаго кляштара да другога, св. Дамінік чытаў Нешпары і малітвы праслаўлення, хвалячы Бога за прыгажосць усяго наваколля. “У такія моманты з яго сэрца лілася песня хвалы і падзякі Богу за шматлікія дары, асабліва за найвялікшы цуд – адкупленне, здзейсненае Езусам Хрыстом”, - казаў ён удзельнікам той аўдыенцыі.

“Ля вытокаў сведчання веры, якое кожны хрысціянін павінен даваць у сям’і, на працы, у сваіх грамадскіх намаганнях, а таксама ў моманты адпачынку, стаіць малітва, асабісты кантакт з Богам. Толькі такія рэальныя стасункі з Богам даюць сілы, каб насычана пражываць кожнае здарэнне, асабліва найбольш пакутныя моманты”, - навучаў Бэнэдыкт XVI. І да сённяшняга дня ён сам працягвае даваць асабістае сведчанне такога стаўлення да духоўнага жыцця.

Нагадаем, што аб сваім рашэнні сысці з пасады Біскупа Рыма Бэнэдыкта XVI паведаміў 11 лютага 2013 г. Праз месяц, 13 сакавіка, на Пасад св. Пятра быў абраны Францішак.