Нунцый ва Украіне: Леў XIV – адзіны голас за мір
Аляксандр Амяльчэня - Vatican News
У размове з Святланай Духовіч з украінскай рэдакцыі "Vatican News" арцыбіскуп Вісвальдас Кульбокас апісаў суровую рэальнасць жыцця ў сталіцы. 5 жніўня 2026 года расійскія войскі ў чарговы раз нанеслі ўдары па Кіеве і іншых гарадах, што прывяло да новых ахвяр сярод мірнага насельніцтва.
Паводле слоў іерарха, звычайным прывітаннем для людзей ужо даўно стала фраза: “Дзякаваць Богу, ты жывы”. Толькі за ліпень сталіца зазнала як мінімум дзесяць балістычных удараў, і ў жніўні атакі працягваюцца з такой жа інтэнсіўнасцю. Тысячы жыхароў змушаны праводзіць ночы ў падземных укрыццях і на станцыях метро.
Голас міру, які чуюць у сутоках вайны
Нунцый падкрэсліў, што ва Украіне надзвычай шануюць выразную пазіцыю Святога Пасада і бесперапынныя заклікі да міру. Ён прыгадаў сустрэчу з прадстаўнікамі Праваслаўнай Царквы, якія шчыра адзначалі важнасць бескампрамісных слоў Пантыфіка.
“У нас ёсць Папа Леў, які настойвае на тым, што ніводная вайна не можа быць апраўдана”, - цытуе арцыбіскуп словы сваіх суразмоўцаў. Іерарх дадаў, што гэтая яснасць успрымаецца як адзіны магутны голас у абарону міру, у той час як спробы некаторых колаў надаць вайне маральны сэнс або нават благаслаўляць яе выклікаюць глыбокую трывогу.
Прысутнасць, што пераадольвае адлегласць і адчай
Вялікае значэнне для падтрымкі людзей мелі візіты спецыяльнага пасланніка кардынала Матэа Дзупі і арцыбіскупа Пола Рычарда Галахера. Нунцый заўважыў, што дабрацца да Кіева сёння лагістычна складней, чым да Новай Зеландыі, таму асабістая прысутнасць ватыканскіх іерархаў мае асаблівую каштоўнасць.
Кардынал Дзупі працягвае займацца гуманітарнымі пытаннямі, а арцыбіскуп Галахер правёў дыпламатычныя сустрэчы і ўзначаліў святую Імшу ў Бярдзічаве.
Паводле арцыбіскупа Кульбокаса, пастаянныя атакі наносяць велізарную псіхалагічную і фізічную шкоду жыхарам краіны. У Херсоне і Харкаве бальніцы і гуманітарныя пункты змушаны працаваць пад зямлёй, а паветра ў сталіцы днямі трымае востры пах ракетнага паліва і гары.
Нунцый са спачуваннем адзначыў цяжкі стан бацькоў, якія штодня перажываюць за жыццё сваіх дзяцей сярод руін і неразарваных касетных боепрыпасаў. У гэтых цяжкіх умовах прадстаўнікі Касцёла працягваюць нястомна маліцца аб навяртанні тых, хто спрабуе апраўдваць гвалт і руйнаванне.
