Касцёл у Нігерыі прапануе іракскі досвед вяртання хрысціян
Аляксандр Амяльчэня - Vatican News
Мільёны хрысціян у так званым Сярэднім поясе Нігерыі за апошнія гады былі вымушаны пакінуць свае дамы праз узброеныя напады і насілле. Многія з іх працягваюць жыць у лагерах для ўнутрана перамешчаных асоб.
Арганізацыя прапануе звярнуцца да досведу Ніневійскай раўніны ў Іраку, дзе пасля захопу рэгіёна баевікамі так званай "Ісламскай дзяржавы" 6 жніўня 2014 года сотні тысяч хрысціян былі вымушаны ўцячы. Пасля вызвалення Масула, Каракаша і іншых населеных пунктаў была рэалізавана праграма "Вяртанне да каранёў", у межах якой аднаўляліся дамы, касцёлы і школы. У 2017-2019 гадах больш за палову раней выселеных жыхароў вярнуліся ў дзевяць адноўленых мясцовасцей.
Такія ж выклікі сёння стаяць перад цэнтральнымі рэгіёнамі Нігерыі. Людзі пакідаюць свае дамы праз напады ўзброеных груп, звязаных з качавымі супольнасцямі фулані, канфлікты за зямлю і пашы, дзейнасць злачынных бандаў і ісламісцкіх груповак.
На жаль, працяглае жыццё ў лагерах вядзе да росту дзіцячай працы, прастытуцыі, дзіцячых шлюбаў, наркаманіі і незаконнага абароту наркотыкаў.
Дырэктар па сувязях з грамадскасцю і рэлігійнай свабодзе арганізацыі "Дапамога Касцёлу ў патрэбе" Марк фон Рыдэман лічыць, што мадэль, рэалізаваная ў Іраку, можа быць выкарыстана і ў Нігерыі, найперш у штаце Бенуэ. Паводле яго слоў, для гэтага неабходныя цеснае супрацоўніцтва дзяржаўных улад і структур Касцёла, а таксама міжнародная падтрымка.
