Катэдру "Нотр-Дам" працягнуць рэстаўраваць у 2027-2033 гадах
Аляксандр Амяльчэня - Vatican News
Новы крок у адраджэнні славутай парыжскай святыні запатрабуе значных фінансавых рэсурсаў. Агульны кошт гэтага перыяду ацэньваецца ў 150 мільёнаў еўра. Цяпер арганізатары маюць у сваім распараджэнні толькі 20 мільёнаў еўра. Астатнюю суму плануецца сабраць дзякуючы шчодрасці мецэнатаў і ахвярадаўцаў.
Апошні рэстаўрацыйны этап запланаваны на 2027-2033 гады. Ён ахоплівае больш за дзесяць важных кірункаў працы. Сярод асноўных задач – поўная рэстаўрацыя вялікага заходняга вітража-ружы, якое лічыцца шэдэўрам мастацтва ХІІІ стагоддзя. Гэты ўнікальны элемент архітэктуры не праходзіў комплекснай рэстаўрацыі з ХІХ стагоддзя. Прадугледжаны таксама працы ў паўночным трансепце, рамонт сярэднявечных скульптур і аслабленых архітэктурных элементаў.
Адкрыццё катэдры Парыжскай Божай Маці для здзяйснення набажэнстваў у снежні 2024 года не азначала поўнага завяршэння прац. Акрамя рамонту пашкоджаных пажарам фрагментаў, было вырашана заняцца кансервацыяй іншых частак. Гаворка ідзе пра тыя элементы храма, якія ўжо даўно патрабавалі сур’ёзнай рэстаўрацыі.
