Папскія медыкі далі парады па ахове здароўя падлеткаў улетку
Аляксандр Амяльчэня - Vatican News
9 чэрвеня 2026 года спецыялісты рымскай педыятрычнай бальніцы "Bambino Gesù" (Дзіцятка Езуса) распаўсюдзілі паведамленне, у якім адзначылі, што з надыходам лета жыццё многіх падлеткаў кардынальна змяняецца.
Заканчэнне школьных заняткаў пазбаўляе маладых людзей звыклага дзённага рытму і важных арыенціраў. Гэта прыводзіць да парушэння рэжыму сну, павелічэння часу ў інтэрнэце, змяншэння прамых сацыяльных кантактаў і надмернай увагі да ідэалізаваных вобразаў у сацыяльных сетках. Спалучэнне такіх фактараў, як сцвярджаюць рымскія медыкі, спрыяе з’яўленню або абвастрэнню псіхалагічнай уразлівасці, асабліва сярод найбольш безабаронных падлеткаў.
"Лета часта звязваюць з дабрабытам і лёгкасцю, аднак для некаторых падлеткаў яно з’яўляецца неадназначным часам, - тлумачыць кіраўнік аддзялення псіхалогіі бальніцы Дэні Менгіні. - Закрыццё школ перарывае штодзённыя звычкі і стасункі, якія для многіх дзяцей выконваюць ахоўную функцыю. Адначасова расце прысутнасць у сацыяльных сетках, якімі часта спрабуюць запоўніць нуду дзён, менш напоўненыя абавязкамі, а таксама ўздзеянне нерэалістычных эстэтычных мадэлей, што можа мець негатыўныя наступствы для самаацэнкі і стаўлення да ўласнага цела".
Міжнародныя даследаванні сведчаць, што ў летнія месяцы падлеткі праводзяць у інтэрнэце ў сярэднім на 45-55 хвілін больш, чым падчас навучальнага года. У Італіі 30 працэнтаў юнакоў і дзяўчат ва ўзросце ад 12 да 17 гадоў знаходзяцца ў сетцы больш за 4 гадзіны штодня. Гэта спараджае так званы "сацыяльны джэтлаг" – значнае парушэнне сну, пры якім час засынання і абуджэнне ссоўваюцца на некалькі гадзін наперад, што закранае да 70-80 працэнтаў падлеткаў.
Разам з тым расце незадаволенасць уласным выглядам, якая назіраецца ў 3 з 10 італьянскіх падлеткаў, а выявы ў інтэрнэце, паводле даных брытанскага Фонду псіхічнага здароўя, пагаршаюць самаўспрыманне ў 40 працэнтаў школьнай моладзі.
У самой бальніцы "Bambino Gesù" за пяць гадоў колькасць дыягназаў парушэння харчавання вырасла больш чым на 60 працэнтаў, асабліва сярод дзяцей да 10 гадоў і ў катэгорыі ад 11 да 13 гадоў, дзе рост склаў 50 працэнтаў.
Для дапамогі сем’ям рымскія эксперты вылучылі дзесяць правілаў збалансаванага лета. Медыкі заклікаюць бацькоў захоўваць рэгулярны графік сну нават падчас вакацый, абмяжоўваць выкарыстанне смартфонаў і відэагульняў у вячэрні час, а таксама пазбягаць лічбавых прылад падчас прыёму ежы. Важна заахвочваць спартыўныя заняткі і баўленне часу на свежым паветры, звяртаць увагу на раптоўныя змены ў харчаванні і не абясцэньваць негатыўныя выказванні падлеткаў пра сваё цела.
Спецыялісты раяць сачыць за праявамі сацыяльнай ізаляцыі, падтрымліваць зносіны па-за сеткай, размаўляць з дзецьмі без асуджэння і пакаранняў, а пры трывалых прыкметах эмацыянальнага дыскамфорту неадкладна звяртацца па кваліфікаваную дапамогу.
