Штучны інтэлект і праца: Святы Пасад пра будучыню чалавецтва
Аляксандр Амяльчэня - Vatican News
5 мая 2026 года ў Папскім Грыгарыянскім універсітэце адбылася сустрэча высокага ўзроўню, арганізаваная пасольствам Злучаных Штатаў Амерыкі пры Святым Пасадзе.
Як паведамляе карэспандэнт "Vatican News" Дэбора Кастэлана Любоў, мерапрыемства сабрала разам распрацоўшчыкаў тэхналогій, тэолагаў, палітыкаў і навукоўцаў, каб абмеркаваць сумесную адказнасць за лёс чалавецтва ў эпоху лічбавізацыі.
Тэхналогіі на службе чалавека, а не замест яго
Сястра Рафаэла Петрыні, старшыня Губернатарата Дзяржавы Ватыкан, падчас свайго галоўнага дакладу адзначыла, што штучны інтэлект – гэта трансфармацыйная сіла. Паводле яе слоў, грамадства апынулася на перакрыжаванні, дзе неабходна рабіць выбар на карысць грамадскіх каштоўнасцей.
З аднаго боку, лічбавізацыя зніжае небяспеку на працоўным месцы і паляпшае ўмовы. З іншага – узнікаюць рызыкі празмернага кантролю і псіхасацыяльных выклікаў. Каб пазбегнуць гэтага, тэхналогіі павінны служыць людзям.
Сястра Петрыні заклікала ўрады рэгуляваць гэтую сферу, а грамадзян – выкарыстоўваць інавацыі крытычна і адказна. Сляпое прыняцце або неабгрунтаваны страх перад новымі сістэмамі аднолькава небяспечныя.
Голас Касцёла і экспертнай супольнасці
Гэтую думку падтрымалі і іншыя ўдзельнікі. Айцец Паола Бенанцы, прафесар Папскага Грыгарыянскага ўніверсітэта, нагадаў хрысціянскі прынцып: чалавек вызначаецца тым, кім ён ёсць, а не тым, што ён вырабляе. Таму работнікаў нельга зводзіць да зменных выдаткаў.
Згодна з даследаваннямі за 2025 год, 65 працэнтаў апытаных работнікаў з энтузіязмам ставяцца да ўкаранення новых тэхналогій у сваю дзейнасць, аднак эксперты папярэджваюць, што 18 працэнтаў працоўных месц знаходзяцца пад рэальнай пагрозай.
Нягледзячы на гэта, траекторыя развіцця не прадвызначана наперад. Як падсумавала сястра Петрыні, менавіта ад нашага маральнага выбару залежыць, ці прынясе новая эра большую салідарнасць, ці створыць чарговую няроўнасць.
